Bo‘sh ish o‘rinlari uchun raqobat kuchaymoqda: O‘zbekistonliklar ommaviy ravishda ish qidirishga kirishdi

Markaziy bank ma’lumotlariga ko‘ra, 2026-yilning birinchi choragida O‘zbekistonda faol rezyumelar soni birdaniga 31,5 foizga ko‘payib, 636 mingtaga yetdi.

Regulyatorning qayd etishicha, mehnat bozorida taklif ish beruvchilar tomonidan bo‘layotgan talabga qaraganda ancha tez o‘smoqda. Shu sababli, bo‘sh ish o‘rinlari uchun kurash va raqobat tobora kuchayib boryapti.

Iqtisodiyot yangi ish o‘rinlari yaratmoqda

Ish izlovchilar safi kengayayotganiga qaramay, mamlakatda bandlik darajasi o‘sishda davom etmoqda. Bu boradagi asosiy o‘sish xizmat ko‘rsatish sohasi — ayniqsa, moliyaviy va sug’urta faoliyati, professional hamda texnik xizmatlar, shuningdek, ma’muriy servis hissasiga to‘g’ri keldi.

Sanoat va savdo tarmoqlarida ham bandlikning barqaror o‘sishi kuzatildi, bu yerda xususiy sektor yetakchilik qilmoqda. Shu bilan birga, qishloq xo‘jaligida ishlayotganlar soni kamayib boryapti — ishchi kuchi sekin-asta boshqa sohalarga ko‘chib o‘tmoqda.

Bo‘sh ish o‘rinlari ko‘paymoqda

Yanvar va fevral oylarida bo‘sh ish o‘rinlari soni biroz kamaygan bo‘lsa, bahorga kelib bozor yana jonlandi. Mart oyining o‘zidayoq ish beruvchilar 15,4 mingta bo‘sh ish o‘rni joylashtirishdi, bu o‘tgan yilning shu davriga nisbatan qariyb 10 foizga ko‘pdir.

Eng katta talab hamon xizmat ko‘rsatish, chakana savdo, qurilish, umumiy ovqatlanish va ishlab chiqarish sohalarida saqlanib qolmoqda.

Ishsizlik darajasi pastligicha qolmoqda

2025-yil yakunlariga ko‘ra, O‘zbekistonda ishsizlik darajasi 4,8 foizni tashkil etdi. Markaziy bank o‘tkazgan so‘rovlar shuni ko‘rsatadiki, kompaniyalar (ayniqsa, savdo va xizmat ko‘rsatish sohasidagilar) hamon yangi xodimlarni ishga olishni rejalashtirishmoqda.

Ish haqi o‘sishda davom etmoqda

Ish izlovchilar o‘rtasidagi raqobat kuchayganiga qaramay, oylik maoshlar baribir o‘smoqda.

Daromadlarning eng sezilarli o‘sishi quyidagi sohalarda kuzatildi:

• Moliyaviy va sug’urta sektori;
• Transport va logistika;
• Xizmat ko‘rsatish sohasi.

2026-yilning birinchi choragida o‘rtacha nominal ish haqi 17,4 foizga, inflyatsiyani hisobga olgan holda esa (real o‘sish) 9,5 foizga oshdi.

Mehnat migratsiyasi yo‘nalishini o‘zgartirmoqda

Yanvar-mart oylari davomida chet elga ketgan O‘zbekiston fuqarolarining soni 1,63 million kishini tashkil etdi — bu o‘tgan yilgidan 11,6 foizga ko‘proq.

Biroq, Rossiyada patent asosida ishlayotganlar soni 1,34 million kishiga kamaydi. Markaziy bank buni mavsumiy omillar va tashqi mehnat bozoridagi vaziyatning o‘zgargani bilan izohlamoqda.

Shu bilan birga, tobora ko‘proq o‘zbekistonliklar muqobil mamlakatlarni tanlamoqda. Masalan, Turkiyada ishlash ruxsatnomasini olganlar soni bir yil ichida 14 foizga o‘sib, 70 mingtaga yetdi. Janubiy Koreyadagi O‘zbekiston fuqarolari soni esa 99,6 ming kishigacha ko‘paydi.