Patent va fuqarolik imtihonlari: endi migrantlar uchun yagona narxlar amal qiladi

2025-yilning 1-yanvaridan boshlab Rossiyada migrantlar uchun rus tili, Rossiya tarixi va qonunchiligi asoslarini o‘z ichiga olgan imtihonlarning narxi qat’iy belgilandi. Patent olish uchun 3800 rubl, vaqtinchalik yoki doimiy yashash ruxsatnomasi (RVP va VNJ) uchun esa 5900 rubl miqdorida to‘lov belgilandi. Ushbu chora fuqarolik olishni istagan migrantlar uchun ham qator yangiliklarni o‘z ichiga oladi. Xo‘sh bu qaror migrantlar uchun nimani anglatadi?

Rus tili, Rossiya tarixi va qonunchilik asoslari bo‘yicha imtihon narxi migrantlar uchun fuqarolik olish maqsadida 2950 rubl etib belgilandi. Bu haqda bosh vazir Mixail Mishustin imzolagan hukumat qarorida keltirilgan.

Avval yagona narx bo‘lmagan

Ilgari bunday imtihonlar uchun qat’iy belgilangan narx bo‘lmagan. Hujjat imtihonni o‘tkazuvchi tashkilot xizmat narxini hisoblash formulasi asosida aniqlashni nazarda tutgan edi. Bu formula imtihon o‘tkazish bilan bog‘liq bevosita xarajatlar, bilvosita xarajatlar hamda QQSni o‘z ichiga olgan edi.

Shu bilan birga, oldingi hujjatda xizmat narxining maksimal miqdori belgilangan edi, u hozir tasdiqlangan summaga to‘g‘ri keladi: RVP yoki VNZH uchun 5900 rubl, ish yoki patent uchun esa 3800 rubl.

Migrantlar uchun imtihon qanday o‘tkaziladi?

Rossiyada legallashtirilmoqchi bo‘lgan migrantlar uchun imtihonlar 2015 yildan beri o‘tkaziladi. U uch moduldan iborat: rus tili, Rossiya tarixi va Rossiya qonunchiligi asoslari.

Imtihonning uch darajasi mavjud: eng oddiy daraja patent olish uchun, o‘rta daraja vaqtinchalik yashash ruxsatnomasini (RVP) olish uchun, va eng murakkab daraja (uchinchi daraja) doimiy yashash ruxsatnomasini (VNZH) olish uchun topshiriladi. Fuqarolik olish uchun hozirda VNZH uchun topshirilgan imtihon sertifikati qabul qilinadi.

Rus tili moduli tinglab tushunish, o‘qish, yozish, leksika va grammatikadan iborat. RVP va VNZH olish uchun imtihonlar og‘zaki qismni, ya’ni gapirishni o‘z ichiga oladi, lekin patent uchun imtihonda bu qism mavjud emas.

Migratsion siyosatdagi o‘zgarishlar

2023-yil bahoridan boshlab, migrantlar uchun rus tili, Rossiya tarixi va qonunchiligi asoslari bo‘yicha imtihon topshirish jarayoniga doir siyosat o‘zgarib bormoqda. O‘shanda tijorat tashkilotlarini imtihon qabul qilish jarayonidan chiqarish va barcha akkreditatsiyalangan 12 universitetni tijorat hamkorlari bilan shartnomalarni bekor qilish qarori qabul qilindi.

Ilgari bunday imtihon markazlari universitetlardan uzoqda joylashgan va faqat tijorat manfaatlarini ko‘zlagan. Ularning faoliyatini nazorat qilish qiyin bo‘lgan, shu bois ko‘p suiiste’molliklar sodir etilgan. Masalan, testlarni qabul qilish uchun mas’ullar migrantlarga imtihon savollarini oldindan ko‘rsatgan yoki gapirish bo‘yicha imtihon videotasvirga olinayotganida, javoblarni doskada yozib berishgan.