Sochlarning tez-tez va ko‘p to‘kilishi jiddiy kasallikdan darakmi?

Bugun aksariyat insonlar soch to‘kilishidan qiynaladi.Ma’lumotlarga ko‘ra, hozir dunyoda ayollarning 75 foizi, erkaklarning 50 foizi aynan shu muammodan aziyat chekmoqda.

Xo‘sh, sochlar tez-tez va ko‘p to‘kilishining asosiy sababi nima?Ushbu savolga Respublika ixtisoslashtirilgan dermatologiya va venerologiya ilmiy-amaliy tibbiyot markazi direktori o‘rinbosari Avaz Inoyatov javob berdi.

Har bir tolaning muayyan umri bor

 — Soch – insonning yarim husni. Biroq uning birlamchi vazifasi chiroy ulashish emas, balki issiq yoki sovuq havodan asrash, — deydi mutaxassis. — Ammo shunga qaramay, sochlarni doim ham saqlab qolishning imkoni yo‘q. Chunki tolalarning muayyan umri bor va bu muddat tugagach, ularning to‘kilishi, tabiiy.

Bir kunda oʻrtacha 80-100 tagacha soch toʻkilishi meʼyor

Mazkur jarayon muntazam davom etib, to‘kilgan sochlar o‘rniga yangilari o‘sib chiqishi kerak. Misol uchun, bir kunda o‘rtacha 80-100 tagacha tola to‘kilishi me’yordir. 

Asosiy sabab – irsiyat

Ushbu jarayon tezlashib, yangi tolalar o‘sib chiqishi kamaysa, o‘z-o‘zidan xavotirlanishga sabab bo‘ladi. Tolalarni to‘kadigan omillar juda ko‘p. Eng avvalo, bu irsiyat bilan bog‘liq. Agar ota-onalardan birida bunday muammo bo‘lsa, u farzandga ham o‘tishi mumkin.

Tangali soch toʻkilishi

Shuningdek, ba’zida soch o‘choqli, ya’ni tanga-tanga bo‘lib to‘kilishi yoki umumiy siyraklashishi mumkin. Ayrim erkaklarda esa androgen alopesiya (tepakallik) uchraydi. Bunday kasallik gormonlar faoliyati buzilishi hamda irsiyat bilan bog‘liq.

Tangali soch to‘kilishi yo‘ldosh kasalliklar hisobiga yuz berishi, gemoglabin kamayganda, homiladorlikda, narkoz olishda va asabiylashganda kuzatilishi mumkin.

Surunkali infeksiyalar, sil, o‘sma kasalliklari, nurlanish, stress, kasb bilan bog‘liq noqulay sharoitlar, noto‘g‘ri parvarish, vitamin va boshqa muhim moddalarning yetishmasligi, ayrim dorilarni qabul qilish hamda oshqozon-ichak traktining patologiyalari ham ushbu muammoni yuzaga chiqaradi.

Shifokorga murojaat qilish lozim

Soch to‘kilishi kishida tushkunlik uyg‘otadi, o‘zidan qoniqmaslik, tortinish hissini kuchaytiradi. Shu bois kishi o‘zida tez-tez soch to‘kilayotganini sezsa, dermatolog-shifokorga murojaat qilishi lozim.