G‘azoda kemiruvchilar bolalarga hujum qilmoqda: Qochqinlar lagerlaridagi tungi dahshat

G‘azo sektorida sanitariya holati shiddat bilan yomonlashmoqda. Falastinlik qochqinlar istiqomat qilayotgan chodirli lagerlarda kalamush va boshqa kemiruvchilar soni keskin ortib ketdi. Xalqaro OAV ma’lumotlariga ko‘ra, bu zararkunandalar odamlarga, ayniqsa, bolalarga asosan tunda hujum qilmoqda.

Uyqudan mahrum bo‘lgan bolalar va bedor tunlar

Lager aholisi kemiruvchilar odamlarni muntazam ravishda tishlab olayotganidan shikoyat qilmoqda. Kalamushlar bolalar uxlab yotgan paytda ularning qo‘l-oyoqlariga yopishmoqda.

Mahalliy aholi vakillaridan birining so‘zlariga ko‘ra, kalamush avval uning uch yoshli o‘g‘lini, so‘ngra o‘zini tishlab olgan. Endilikda oila a’zolari bolalarni himoya qilish uchun tunda navbat bilan poyloqchilik qilishga majbur. Odamlar deyarli uyqudan qolgan, chunki bir lahzalik e’tiborsizlik ham yangi hujumlarga sabab bo‘lishi mumkin.

Xarobalar va chiqindilar ichidagi hayot

Davom etayotgan harbiy harakatlar oqibatida G‘azoda ikki milliondan ortiq kishi boshpanasiz qoldi. Odamlar vayron bo‘lgan binolar yoki chiqindixonalar yaqinidagi vaqtinchalik chodirlarda kun kechirishmoqda.

Bunday sharoit kemiruvchilarning ko‘payishi uchun ayni muddao bo‘lib, ular nafaqat oziq-ovqat va shaxsiy buyumlarni payhon qilmoqda, balki odamlarning yashash joylariga ham bostirib kirmoqda. Lagerda yashovchi ayollardan biri to‘yiga bir necha kun qolganida kalamushlar uning liboslari va bayram anjomlarini g‘ajib, yaroqsiz holga keltirganini achiniq bilan so‘zlab berdi.

Yuqumli kasalliklar xavfi va shifoxonalardagi navbatlar

Shifokorlarning ta’kidlashicha, shifoxonalarga har kuni kemiruvchilar tishlashi natijasida jabrlangan bemorlar olib kelinmoqda. Ular orasida bolalar va keksalar talaygina.

Mutaxassislar leptospiroz va boshqa xavfli infeksiyalar tarqalishi mumkinligidan ogohlantirmoqda. Antisanitariya sharoitida kalamush tishlashi tana haroratining ko‘tarilishi va turli og‘ir asoratlarga olib kelishi mumkin.

Yetishmovchilik va kuchayayotgan inqiroz

Zararkunandalarga qarshi kurashish vositalarini olib kirishga qo‘yilgan cheklovlar vaziyatni yanada og‘irlashtirmoqda. So‘nggi haftalarda bir necha o‘n tonna dori vositalari va mingdan ortiq tuzoqlarni olib kirishga ruxsat berilgani aytilmoqda.

Biroq ko‘lamli gumanitar inqiroz fonida bu choralar dengizdan tomchi, xolos. Kunlar isishi bilan muammo yanada chuqurlashishi, sanitariya holati esa butunlay izdan chiqishi kutilmoqda.

Nazoratdan chiqayotgan fojia

G‘azo sektori nafaqat urush asoratlari, balki shiddat bilan yoyilayotgan sanitariya inqirozi bilan ham yuzma-yuz keldi. Lagerlardagi ayanchli sharoit tinch aholi, birinchi navbatda, bolalarning salomatligi va hayotiga to‘g‘ridan-to‘g‘ri xavf solmoqda.