Ўзбекистон терма жамоаси Эрондан қочяпти(ми)?

Сўнгги ўйинини Эронга қарши ЖЧ-2026 саралаши доирасида Тошкентда ўтказган мамлакатимизнинг бош жамоаси форс нашрларида ёзилишича, бир неча маротаба Теҳронда Эронга қарши ўртоқлик учрашуви ўтказишдан бош тортган.

Эрон терма жамоасининг ўртоқлик ўйинларини ташкил этишдаги муаммоларига бағишланган бир мақолада Ўзбекистон терма жамоаси 2018 йилдан бери Эронда ўйнашдан бош тортиб келаётганлиги ёзилган. Бунга, паспортдаги Эронга кириш визасининг келажакда АҚШ, Канада ва Буюк Британия каби давлатларга киришда муаммолар келтириб чиқариши сабаб қилиб кўрсатилган. Мақолада таъкидланишича, нафақат Ўзбекистон терма жамоаси, балки Европа ва Жанубий Американинг кўплаб терма жамоалари айнан юқоридаги сабаб туфайли Эронга келишдан бош тортишмоқда. Бундан ташқари, Эрон футбол федерациясининг кучли рақибларни олиб келиш учун молиявий имкониятининг йўқлиги ҳам номдор терма жамоаларнинг Теҳронга ташриф буюришига тўсқинлик қилмоқда.

2024 йилнинг 4 январь куни Осиё кубогига жўнаб кетиш олдидан Теҳронда Индонезия терма жамоасига қарши ўтказилиши лозим бўлган ўртоқлик учрашуви ҳам, меҳмонларнинг ўйинни Туркияда ўтказиш қарори туфайли бекор қилинган. Маълумот учун, Ўзбекистон терма жамоаси эндиликдаги ўйинини Осиё Кубоги доирасида Сурия терма жамоасига қарши ўтказади.