Қайноқ ўйиннинг “совуқ” таҳлили: Ўзбекистон — Сурия ўйинига назар

13 январь куни Ўзбекистон терма жамоаси Осиё Кубогидаги ўзининг илк учрашувида Сурия терма жамоасига қарши майдонга тушиб, нурсиз дуррангга имзо чекди. Ўйин давомида ва ундан сўнг кўплаб хато ва камчиликлар юзага чиқа бошлади. Хўш, қайси сабабларга кўра биз икки очкодан маҳрум бўлдик?

Асосий таркиб танлови

Сурия терма жамоасига қарши ўйиндан аввал Ўруновнинг асосий таркибда майдонга туширилиши барча учун кутилган ҳол эди, аммо унинг ҳужумчи сифатида танланиши мутахассислар учун кутилган, мухлислар учун кутилмаган қарор бўлиб чиқди. Амалда кўпчилик қабул қила олмаганидек, Остоннинг ўзи ҳам бу позицияни ҳали “қабул қилиб улгурмагани” кўриниб қолди. Кўплаб мутахассислар талқин қилганидек, бу вазиятда биз ростдан ҳам бир вақтнинг ўзида яхши вингер ва ҳужумчидан айрилдик. 

Эски услуб 

Одатда, Сайфиев Машарипов билан биргаликда “Пахтакор”даги фаолияти сабаб, ҳалигача терма жамоа сафида ўз ҳолати ҳар қандай тақдирда бўлишидан қатъий назар асосий таркибдан жой олиб келади. Бу боғлам илк ўйинда яхши самара бермади. Шундай бўлишига қарамай, яна шу томонда ўйинни давом эттиравердик. Ҳожиакбарнинг жароҳати майлига, Эркиновдан, унинг спринтларидан умуман фойдаланмадик, ҳисоб. Катанец консерваторроқ мураббийлиги барчага маълум бўлиб улгуряпти. Шундай бўлса-да, эндиликда чап қанотимиздаги “эски услуб”дан воз кечмасак, вазият бундан ҳам ёмонлашиб борадигандек. Иккинчи бўлимда чап қанотдаги “хатолар” тўғриланиб, кутилмаганда, Сайфиев ўнг қанотда ўйинни давом эттирадиган бўлди. Ўсмирлар ва “Насаф” таркибида катта ўйинларда ҳам хотиржам ҳамда сермаҳсул ҳаракатланган Зафармурод варианти танланмади. Кейинчалик маълум бўлишича, Абдураҳматов ўйин қайдномасидан ўрин олмаган экан. Қизиқ, Зафармуродда ҳам Ҳожиакбардаги каби интеллект ва тезлик бор. Қўшимчасига, дриблинг ва яхши зарба ҳам. Эндиликда, Ҳожиакбар тўлиқ сафдан чиқар экан, нима учун Ҳожиакбардан кейин қанотнинг асл эгаси Зафармуродга имконият берилмаслиги керак?

Кескинлаштирувчи куч

Файзуллаев масаласига тўхталадиган бўлсак, иккинчи бўлим шуни кўрсатдики, эндиликда жамоа узоқни кўзлаган бўлса, Аббосбек Файзуллаевдан захирадан майдонга қўшилиб, ўйинни кучайтирувчи сифатида эмас, асосий таркибда, ҳал қилувчи сифатида фойдаланиши лозимдек кўринмоқда. Акс ҳолда, охирги учрашув каби бир ўйин учун эмас, бутун мусобақа учун кеч бўлиши мумкин. Аббосбек ўйинга қўшилгач, жуда кўп маротаба кескинлаштирувчи вазифасини ўтаб берди. Айнан у ўйинимизга кайфият бағишлади. Аббос кўп эҳтимол келаётган ўйинларда, агарда, асосий таркиб ўйинчиси сифатида танланса, ўнг қанотдан ўрин эгаллайди. Эндиги ўйинларда биз ундан етарлича фойдаланишимиз мумкин, фақат, Сречко Катанецнинг “консерваторлиги” тутуиб қолмаса бўлгани.

Кечикиш 

Катанец бундан аввалги учрашувларда ҳам жуда кўп бора турли хил масалаларда кечикмоқда. Масалан, бундан аввалги ўртоқлик ва ЖЧ саралаш ўйинларида ҳам шундай ҳолат кўп содир бўлганди. Вазиятга кеч реакция бериш. Тўғри, охирги ўйинда ўзгаришлар вақтида амалга оширилди, аммо схематик ўзгаришлар кечикиб, ҳатто, ўзгартирилмади ҳам. Ҳимояланишга эҳтиёж йўқ вақтда ҳам майдонда, деярли, кўринмай қолган Ҳамробеков ўрнига ҳужум учун нимадир қилиб бера оладиган Искандеров ё бирор футболчи ўйинга қўшилмади. Бутун ўйин давомида уч ҳимоячи ҳаракатланди. Гарчи, ҳимояга эҳтиёж у қадар сезмадик. Балки, бир ҳимоячи ўрнига бирор олдинги чизиқ вакили туширилиши керак эдими, деган фикр фақатгина биздан ўтмаган бўлса керак?! Ниятимиз жиддий бўлса, эндиликда вазият ва рақибдан келиб чиқиб, икки ҳимоячи бўлиб ўйнашга ҳам ўтишимиз лозимдек.

Эҳтимолий плей-офф сценарийсининг ёмонлашуви

Умуман олганда, кечаги ўйиндан сўнг барча мухлислар қаторида менинг ҳам кўнглим бироз ғашланди. Мухлислардан фарқли, мендаги хафагарчилик натижа, дурранг, схема, ўзгаришлар ёки бошқа нимагадир эмас, эҳтимолий келажак сценарийси ёмонлашиб кетгани сабаб содир бўлди. Сурияга қарши дурранг орқали ҳаммасини жуда мураккаблаштириб олдик. Эндиликда келажакдаги мусобақа сеткаси ноқулайлашиб қолиш эҳтимоли юқори. Энди биз эҳтимолий чорак финал босқичида Қатар билан эмас, Саудия билан рўбарў келишимиз ёки Япония билан нимчорак финал босқичидаёқ тўқнаш келиб, кўп эҳтимол мусобақани шу босқичда якунлашимиз мумкин. Энг яхши, дея кўрилаётган иккинчи ўрин йўли бундан буёғига мураккаб иш. Мана шу масала мени кўпроқ ўйлантиряпти. Сурия кейинги икки ўйинда бир ғалаба ва бир дурранг орқали 5 очко тўплаши, Австралияга қарши ўйинда мағлубият орқали 4 очко жамғариши мумкин. Ўзбекистон ҳам келаётган икки ўйинда мана шундай натижага эришиши ёки Австралияни мағлуб этиб, 7 очко жамғарган ҳолда кейинги босқичга биринчи ўрин билан йўл олиши мумкин. Бунда жамоа икки ҳолатда ҳам қийин аҳволга тушади. Биринчи вазиятда учинчи ўринга тушиш эҳтимоли ва нимчорак финалда Япония билан баҳслашиш ёки биринчи ўринни олган ҳолда, чорак финалда Саудия Арабистони билан рақиб бўлиши мумкин. Бу эса, вазиятни бирмунча мураккаблаштиради. Биз кутган ва умид қилган идеал йўлак — энди муаммо.