Daraxtlarni kesmay turib ham qurilish qilishning imkoni bor

Bugungi kunda Toshkent shahrida biror-bir joy atrofi o‘ralishi bilanoq jamoatchilikda ekologiya borasida keng muhokamalar boshlanadi. Yana yangi inshootlar qurilishi natijasida o‘sha hududlardagi yashillik darajasi jiddiy ziyon ko‘radi hamda bir qator daraxtlar qurbon qilinadi. Bu esa o‘z navbatida o‘sha hududda istiqomat qiluvchi aholi hamda ekofaollarning noroziligiga sabab bo‘ladi. Ammo bu “daraxt kesmay turib qurilish ishlarini olib borish imkonsiz” degani emas.

Yana qurilish, ammo daraxtlar saqlab qolinadi

Tadbir davomida ma’lum bo’lishicha, Toshkent shahrining Istiqbol va Sodiq Azimov ko‘chalari kesishmasi yaqinida “Tenet Group” tomonidan qurilish ishlari olib amalga oshirilmoqda. Ushbu loyihani amalga oshiradigan kompaniya esa qurilish bo‘ladigan hududdagi daraxtlarni ko‘chirib o‘tish yo‘li bilan saqlab qolmoqchi. Shu maqsadda kuni kecha ilk jamoatchilik eshituvi bo‘lib o‘tdi.

Hududda 42 tup daraxt mavjud

“Tenet Group” egallagan maydon 11 900 metr kvadratni tashkil qiladi. Aynan ushbu hududda 9 ta turdagi jami 42 tup daraxt mavjud bo‘lib, bular: 9 tup terak, 17 tup aylant, 7 tup o‘rik, 3 tup yong‘oq, 2 tup olma va 1 tadan gilos, shaftoli, qarag‘ay hamda shumtol bargli zaranglardir. Kompaniya ushbu daraxtlarning 34 tasini bu hududdan boshqa joyga emas, hududning bir qismidan ikkinchi qismiga ko‘chirib o‘tqazish niyatida. Shuningdek, daraxtlarni ko‘chirib o‘tish masalasida “Tenet Group” bilan hamkorlik qilayotgan “Max Processing” kompaniyasi rahbari Bekali Ismoilov ushbu hududdagi 8 tup yovvoyi holda o‘suvchi daraxtga ko‘chirib o‘tish maydonida joy tanqisligi sababli ular maxsus parvarishlash maydoniga olib borilishini ta’kidladi. Unga ko‘ra, ular orasidan yovvoyi holda oʻsuvchi daraxtlar, ya’ni 1 tup qarag‘ay va 7 tup aylant daraxti reabilitatsiya uchun qulay bo‘lgan muhitga ko‘chirib o‘tqaziladi.

Ko‘chirishga tayyorgarlik uchun daraxtlarni parvarishlash uch oy avval boshlangan

Bekali Ismoilovning ta’kidlashicha, ushbu hududda “Tenet Group” tomonidan qurilish ishlariga tayyorgarlik boshlangan vaqtdayoq, ya’ni uch oy oldin ushbu kompaniya bilan hamkorlikni yoʻlga qoʻygan va o‘sha paytdanoq daraxtlarni parvarishlash boshlangan.

“Biz sizlarga ko‘chirish ishlari qanday amalga oshirilishini ko‘rsatmoqchimiz. Bunda har bir daraxt biz uchun qadrli bo‘lib, uni yashovchanligini aniqlab, harakatlantirishga tayyorlaymiz. Ko‘chirish jarayoni mas’uliyat talab qiluvchi vazifa bo‘lib, har bir detalga e’tibor berishni taqazo qiladi. Biz ko‘chirish yakunlangandan so‘ng daraxtlarni 95 foiz yashab ketishiga kafolat beramiz hamda doimiy parvarishlanishiga so‘z beramiz. Bizning jamoada malakali dendrolog va ekologlar ishlaydi”, deydi “Max Processing rahbari.

Ko‘chirib o‘tish ishlari qachon amalga oshiriladi?

UZ24 muxbiri ushbu savol bilan murojaat qilganida Bekali Ismoilov shu yaqin kelajakdagi eng salqin kecha ko‘chirish ishlari amalga oshirilishini ta’kidladi. Shuningdek, daraxtlar qayta ekishdan so‘ng 3 yil mobaynida “Max Processing” nazorati ostida bo‘ladi va mavsumiy ob-havoga qarab, daraxtlarning holati muntazam nazorat qilib boriladi.

“Yangi loyihani ishlab chiqishda kompaniya xodimlari ekologik muvozanatni saqlab qolish uchun e’tibor qaratishgan. Shu sababdan ham loyiha doirasida bioxilmaxillikni ta’minlash va ekotizimni qo‘llab-quvvatlash maqsadida qo‘shimcha ravishda tumanimizning ehtiyoji bo’lgan boshqa hududida yana 100 tup daraxtni ekish rejalashtirilgan. Albatta, bunda hududning iqlim sharoiti va tuproq talablariga mos keladigan bargli va ignabargli daraxtlar tanlanadi”, — deya qo‘shimcha qildi “Tenet Group” rahbari Doniyor Alimov.