Pavel Durov: “Telegram — anarxik jannat emas”

Telegram messenjerining asoschisi Pavel Durov Fransiyada sodir bo‘lgan qo‘lga olish voqeasini ilk bor izohlab o‘tdi.

Durov Parijda hibsga olinishini kutmagan

Durovning soʻzlariga koʻra, Parijga kelganidan soʻng uni politsiya toʻrt kun davomida soʻroq qilgan. U oʻzini Fransiya politsiyasi tomonidan qoʻlga olinishi hamda soʻroq qilinishini kutmagan.

Tadbirkor Telegramda Yevropa Ittifoqi davlatlarida talab va soʻrovlar uchun mas’ul vakil mavjudligini eslatib oʻtdi. Vakilning elektron pochta manzili barcha Yevropa Ittifoqi fuqarolari uchun ochiq, bu manzilni Google orqali topish mumkinligi qoʻshimcha qilindi.

Terrorizmga qarshi kurashishda Telegramning yordami

Pavel Durov fransuz hukumatining u bilan turli yoʻllar orqali bogʻlanishi va yordam soʻrashlari mumkinligini taʼkidladi, chunki u mamlakat fuqarosi sifatida tez-tez Dubaydagi konsullikka borgan. Bir qancha vaqt oldin u fransuz hukumatiga terrorizmga qarshi kurashish uchun Telegram bilan issiq aloqa liniyasini oʻrnatishda shaxsan yordam berganini ham eslatib oʻtdi. 

Notoʻgʻri yondashuv

Telegram asoschisining qo‘shimcha qilishicha, agar internet xizmatidan norozi bo‘lsa, xizmatning o‘ziga nisbatan ish ochish kerak. Durov smartfonlar paydo bo‘lgunga qadar yozilgan qonunlardan foydalanishni noto‘g‘ri yondashuv deb atadi, unga ko‘ra kompaniya rahbari o‘zi boshqarayotgan platformada uchinchi shaxslar tomonidan jinoyatlarda ayblanishi mumkin.

“Hech bir innovator bu vositalarni suiiste'mol qilish uchun shaxsan javobgar bo'lishi mumkinligini bilsa, hech qachon yangi vositalar yaratmaydi”, - deb hisoblaydi tadbirkor. 

“Telegram anarxik jannat emas”

Durov baʼzan Telegram biror davlatning regulyatorlari bilan xavfsizlik va maxfiylik oʻrtasidagi muvozanat haqida kelisha olmasligini va bu holda messenjer oʻz prinsiplarini saqlab qolish uchun davlatni tark etishga tayyorligini taʼkidladi. 

“Rossiya bizdan kuzatuvni faollashtirish uchun “shifrlash kalitlarini” topshirishimizni talab qilganida, biz rad javobini berdik va Telegram Rossiyada taqiqlangan edi. Eron tinch namoyishchilarning kanallarini to‘sib qo‘yishimizni talab qilganida, biz rad javobini berdik – va Telegram Eronda ham taqiqlangan edi. Bularning barchasi Telegram mukammal ekanligini anglatmaydi. Hatto rasmiylar savollarni qayerga yuborishni bilmay qolishi bizni yaxshilashimiz kerak bo'lgan narsadir. Ammo baʼzi OAVlarda Telegram oʻziga xos anarxik jannat ekanligi haqidagi daʼvolar mutlaqo notoʻgʻri”, - deb yozadi Durov.

Durov oʻz oldiga shaxsiy maqsad qo'ydi

Messenjer asoschisi Telegramda har kuni millionlab zararli postlar va kanallar o‘chirib tashlanishi, platformada shaffoflik hisobotlari e’lon qilinishi, shuningdek, shoshilinch moderatsiya so‘rovlarini tezkorlik bilan ko‘rib chiqish uchun nodavlat tashkilotlar bilan bevosita ishonch telefonlari mavjudligiga ishontirdi.

Durov Telegram foydalanuvchilari sonining tez o'sishi og'riqlarning kuchayishiga olib kelganini, bu jinoyatchilar uchun platformadan foydalanishni osonlashtirgani va shuning uchun u bu boradagi vaziyatni sezilarli darajada yaxshilashni o'z oldiga shaxsiy maqsad qilib qo'yganini bildirdi.

“Biz bu jarayonni allaqachon ichkarida boshlaganmiz va men siz bilan tez orada taraqqiyotimiz haqida batafsil ma'lumot beraman. Umid qilamanki, avgust voqealari Telegram va umuman ijtimoiy media sohasi xavfsizroq va kuchliroq bo‘lishiga olib keladi. Sevgingiz va memlaringiz uchun yana bir bor tashakkur”, - deya xulosa qildi u.

Eslatib o‘tamiz, 24-avgust kuni Pavel Durov Parij aeroportiga kelganida hibsga olingan edi. U Telegram messenjerini yetarli darajada moderatsiya qilmaslikda gumon qilingan.