Endi SI turkiy tillarni xatosiz tushunadi

Qozog‘istonning Cybernet AI startapi turkiy tillar uchun eng yirik nutqni avtomatik tanib olish (ASR) modelini taqdim etdi. Bu Markaziy Osiyoda yaratilgan birinchi ishlanma bo‘lib, turkiy tillar guruhi xususiyatlariga mo‘ljallangan to‘laqonli sun’iy intellekt modelining ilk namunasi hisoblanadi.

Qaysi tillar asosida yaratilgan?

Loyiha Microsoft GPU infratuzilmasida Astana Hub hamda Qozog‘iston Respublikasi Sun’iy intellekt va raqamli rivojlanish vazirligining strategik ko‘magida amalga oshirilgan.

“Cybernet AI ishlanmasi turkiy tillar guruhi mamlakatlariga o‘z ona tillarida raqamli xizmatlar va mijozlarga xizmat ko‘rsatishni sun’iy intellektdan foydalangan holda sifatni yo‘qotmay va arzon narxda kengaytirish imkoniyatini beradi. Qozog‘iston uchun bu global sun’iy intellekt yechimlari iste’molchisi rolidan xalqaro miqyosda raqobatbardosh bo‘lgan o‘z texnologiyalarini ishlab chiquvchi mavqeyiga ko‘tarilishni anglatadi”, deydi Astana Hub boshqaruvchi direktori Tanat Uskembayev.

Model qozoq, turk, o‘zbek, qirg‘iz, ozarbayjon va tatar tillari asosida yaratilgan bo‘lib, mijozlarning biznes muloqotlarida va davlat xizmatlaridan foydalanishda keng tarqalgan format - aralash turkcha-ruscha nutqni ham to‘g‘ri taniy oladi.

Endi sifat cheklanmaydi

Shu paytgacha Markaziy Osiyo mintaqasi davlatlari asosan ingliz tiliga mo‘ljallangan xalqaro ASR modellaridan foydalanishga majbur edi. Bunday yechimlar turkiy fonetika, talaffuz va aralash nutqni yetarlicha hisobga olmagani sababli ovozli sun’iy intellekt xizmatlarining sifatini cheklab kelgan.

“Biz ongli ravishda ingliz tilidagi modellarni moslashtirish g‘oyasidan voz kechdik va jonli, aralash so‘zlashuv tilini dastlab tushunadigan ASR modelini yaratdik. Bu ishlanma shunchaki navbatdagi texnologik mahsulot emas, balki sun’iy intellektning mahalliy ekotizimini va texnologik mustaqilligini shakllantirishga qo‘shilgan hissadir”, deydi Cybernet AI kompaniyasining texnik direktori Rashid Ismailov.

Yangi ASR modeli katta hajmdagi ovozli aloqalar bilan ishlaydigan korxonalar - banklar va moliya tashkilotlari, telekommunikatsiya operatorlari, turli darajadagi aloqa markazlari, logistika va xizmat ko‘rsatish kompaniyalari, aholiga xizmat ko‘rsatuvchi davlat tuzilmalariga mo‘ljallangan.

Model ishlab chiquvchilarning fikricha, u mijozlarni qo‘llab-quvvatlash kanallaridagi xarajatlarni kamaytirishga yordam beradi, xizmat ko‘rsatishning eng ko‘p talab qilinadigan ovozli formatda uzluksiz mavjudligini ta’minlaydi.

Model shovqinga, talaffuz xususiyatlariga va bir gapda tillarni almashtirishga chidamli bo‘lib, fintexdan tortib davlat xizmatlarigacha bo‘lgan turli sohalarda yuqori aniqlikni namoyish etadi.