Бухорода юк машиналаридан ҳосил қилинган тўй кортежи тўхтатилди

Бухоро вилоятидан ўтган М-37 халқаро автомагистралида ЙҲХБ ходимлари юк машиналаридан иборат тўй кортежини тўхтатди. Машиналар жарима майдончасига жойлаштирилди.

М-37 халқаро автомобиль йўлининг Бухоро вилояти Бухоро туманидан ўтган қисмида ЙҲХБ ходимлари тўй кортежи билан ҳаракатланиб, йўл ҳаракати қоидаларини бузган учта юк машинасини тўхтатди. Бу ҳақда ИИВ ЙҲХХ матбуот хизмати хабар берди.

Унда айтилишича, асли ромитанлик ака-укалар кенжа укасининг тўйини ўзгача ўтказиш учун тўй кортежига юк машиналарини қўшишни келишиб олади.

Эълон қилинган видеода юк машиналари дастлаб кичик йўлда икки қаторни, кейин эса халқаро трассада бир йўналишни эгаллаган ҳолда илон изи тарзида ҳаракатланганини кўриш мумкин.

«Биз нотўғри иш қиляпмиз деб ўйламаган эдик», — деди кортеж иштирокчиларидан бири.

Ҳайдовчиларга нисбатан маъмурий баённомалар тузилиб, машиналар жарима майдончасига жойлаштирилди.