O'zbekistonda davlat byudjetidan ish haqi, pensiya va nafaqalar uchun qancha mablag‘ sarflangani ma'lum bo'ldi

Iqtisodiyot va moliya vazirligi 2023-yilda davlat byudjetidan ish haqi, pensiya va nafaqalar uchun qancha mablag‘ sarflanganini ochiqladi. 

Davlat tashkilotlarida ishlovchi xodimlar

Iqtisodiyot va moliya vazirligi ma'lum qilgan axborotga ko‘ra, o‘tgan yili ish haqi va pensiya uchun to‘lovlar miqdori 2022-yildagidan sezilarli ortgan. Xususan, davlat tashkilotlarida ishlovchi xodimlar ish haqi uchun byudjetdan jami 93 trillion so‘m to‘lab berilgan. 2022-yilda bu raqam 78,9 trillion so‘mni tashkil qilgan.

Nafaqa va ijtimoiy yordamlar

2023-yilda fuqarolarning barcha turdagi pensiyalari uchun 53 trillion 596 milliard so‘m yo‘naltirilgan. Taqqoslash uchun, 2022-yildagi jami ko‘rsatkich 44,9 trillion so‘mni tashkil etgan. Davlat byudjeti hisobidan ijtimoiy nafaqalar uchun yil davomida 21,7 trillion so‘m sarflangan. 2022-yilda bu yo‘nalishga 20,3 trillion so‘m ajratilgan.

Maʼlumot uchun, ayni dam O'zbekiston davlat tashkilotlarida 2 million 478 ming nafardan ortiq xodim ishlaydi. Mamlakatda pensiya oluvchilar soni 4 million nafarga yetgan. Nafaqa va moddiy yordam oluvchilar esa 2 million 471 ming 900 nafarni tashkil etadi.