“Wonderboy” chempionlik jangida qatnashadi
Butunjahon boks assotsiatsiyasi (WBA) o‘zbekistonlik bokschi Shahram G‘iyosov ishtirokidagi chempionlik jangiga buyruq berdi.
1 daqiqa o‘qiladi
O‘zbekiston professional boks federatsiyasi axborot xizmati Butunjahon boks assotsiatsiyasi (WBA) o‘zbekistonlik bokschi Shahram G‘iyosov ishtirokidagi chempionlik jangiga buyruq berganini ma’lum qildi.
Asosiy masala hal
O‘zbekiston professional boks federatsiyasining qayd etishicha, WBA yarim o‘rta vazn toifasi chempioni Eymantas Stanionisning ushbu kamarga majburiy da’vogar Shahram G‘iyosovga qarshi jang o‘tkazishi kerakligini bildirgan. Endi bokschilarning jamoasi o‘zaro jang sanasi, manzili va shartlari bo‘yicha kelishib olishi lozim.
Shahram G‘iyosov va Eymantas Stanionisning natijalari
Shahram G‘iyosov bugunga qadar 16 ta jang o‘tkazgan va barchasida g‘alaba qozongan. U so‘nggi jangida meksikalik Migel Parra (22-4-1)ni mag‘lubiyatga uchratgan edi. To‘liq 10 raund davom etgan jangda hakamlarning ikki nafari o‘zbekistonlik bokschi g‘alabasini, bir nafari Parraning g‘alaba qozonganini qayd etgandi. Uning bo‘lajak raqibi bo‘lishi mumkin bo‘lgan litvalik 30 yoshli bokschi esa professional boksda 15 ta jang o‘tkazib, barchasida g‘alaba qozongan. Janglarining 9 tasini muddatidan avval yakunlagan.
