Endi Dubayga yo‘llar ochiq: BAA havo hududi to‘liq ochildi

Mintaqaviy ziddiyatlar fonida joriy etilgan cheklovlar bekor qilinishi ortidan Fors ko‘rfazining yirik aviatsiya xabi o‘z faoliyatini to‘liq tiklamoqda.

Birlashgan Arab Amirliklari 2-may sanasidan e’tiboran mamlakat havo sarhadlari barcha turdagi parvozlar uchun qayta ochilganini rasman tasdiqladi. Fuqaro aviatsiyasi bosh boshqarmasi tomonidan berilgan bayonotga ko‘ra, vaqtinchalik xavfsizlik choralari o‘z dolzarbligini yo‘qotgan va aviaqatnovlar avvalgi grafik asosida amalga oshirilmoqda. Garchi vaziyat barqarorlashgan bo‘lsa-da, rasmiylar yo‘lovchilar xavfsizligini kafolatlash maqsadida havo kengliklarini doimiy monitoring qilishda davom etishini ta’kidlamoqda.

Ushbu majburiy tanaffus bevosita Yaqin Sharqdagi geosiyosiy vaziyatning keskinlashuvi bilan bog‘liq edi. AQSH va Isroilning Eronga nisbatan harbiy amaliyotlari hamda Tehronning bunga qaytargan javob zarbalari mintaqada xavfsizlik xatarlarini eng yuqori nuqtaga olib chiqdi. Mazkur tahdidlar tufayli Fors ko‘rfazi davlatlari, jumladan BAA ham, fuqaro aviatsiyasi xavfsizligini o‘ylab o‘z havo hududini yopishga majbur bo‘ldi.

Daqiqasiga million dollarlik zarar

Aviatsiya sohasidagi ushbu tanaffus mintaqa iqtisodiyoti uchun shunchaki texnik cheklov emas, balki ulkan moliyaviy zarba bo‘ldi. Ayniqsa, dunyoning eng yirik tranzit markazlaridan biri sanalgan Dubay xalqaro aeroportining faoliyati to‘xtashi iqtisodiy ko‘rsatkichlarga jiddiy putur yetkazdi. NDTV World tahlilchilarining hisob-kitoblariga ko‘ra, aeroportning har bir daqiqalik turib qolishi Amirlik g‘aznasiga o‘rtacha 1 million dollar miqdorida zarar keltirgan.

Iqtisodiy yo‘qotishlar ko‘lami faqatgina aeroport yig‘imlari bilan cheklanib qolmadi. Ekspertlarning fikricha, aviakompaniyalarning reyslari bekor qilinishi, mehmonxona biznesidagi uzilishlar va turizm oqimining kamayishi BAA iqtisodiyotining strategik tarmoqlariga zanjirsimon salbiy ta’sir ko‘rsatdi.

Hozirda havo qatnovlari bosqichma-bosqich to‘liq hajmda tiklanmoqda. Bu esa nafaqat transport logistikasini, balki mintaqadagi iqtisodiy barqarorlikni ham qayta tiklash yo‘lidagi muhim qadam sifatida baholanmoqda. Shunga qaramay, yuzaga kelgan vaziyat global aviatsiya tizimining siyosiy barqarorlikka naqadar bog‘liqligini yana bir bor isbotladi.