“Аёллар дафтари”га кириш тартиби ўзгартирилмоқда

Оила ва хотин-қизлар қўмитаси Ҳукуматнинг 145-сон қарори билан тасдиқланган “Аёллар дафтари”га қўшимчалар киритишни таклиф қилмоқда.

Сабаб нима?

Сўнгги пайтларда масъул ташкилотларни чалғитиш орқали турмуш ўртоғи билан никоҳини бекор қилдирган шахслар ижтимоий ёрдам олиб, уй-жойга эга бўлаётганлиги ҳолатлари кўпаймоқда.Бу эса иқтисодий аҳволини яхшилашга эҳтиёжманд хотин-қизларнинг эътибордан четда қолиб кетишига сабаб бўлмоқда.

3 ойда 13 мингдан ортиқ ажрим

Маълумот учун, 2023 йил январ-март ойларида жами бўлиб, 13 102 та оилавий ажралишлар қайд этилган. Бу миқдор 2022-йилнинг шу даврига нисбатан 938 тага, яъни 7,7 фоизга ошган. Бу эса ўз ўрнида, уй-жойга эга бўлиш, касб-ҳунарли бўлиш, иқтисодий аҳволини ўнглашга эҳтиёжманд аҳолининг давлат ижтимоий ёрдамини олишини чеклаб ўзига хос тўсиқ бўлмоқда.

Қандай ўзгариш?

Шу сабабдан, Ҳукуматнинг 145-сон қарори билан тасдиқланган “Аёллар дафтари”ни юритиш орқали хотин-қизлар муаммоларини тизимли равишда ҳал этиш ва уларни ижтимоий қўллаб-қувватлаш тартиби тўғрисида низомга қўшимча киритишни таклиф қилмоқда.

Унга кўра, “Аёллар дафтари”га киритиладиган хотин-қизлар рўйхатини шакллантиришда комиссия томонидан ижтимоий ёрдам олиш учун никоҳи бекор бўлган аёлнинг умумий рўзғор асосида эр-хотин бўлиб яшаётганлиги аниқланса, масъул ташкилотларни чалғитиш деб ҳисобланади ва мазкур дафтарга киритиш рад этилади.

2,5 миллиондан ортиқ хотин-қизларга ёрдам кўрсатилган

Маълумот учун, 2020 йилдан бошлаб йўлга қўйилган “Аёллар дафтари” тизими орқали қарийб 2,5 миллиондан ортиқ хотин-қизларга ижтимоий-иқтисодий, тиббий, ҳуқуқий ва психологик кўмак бериш учун 5,1 триллион сўмдан зиёд маблағ йўналтирилган.