O‘zbekistondan Saudiya Arabistoni va BAAga reyslar qayta tiklandi

O‘zbekiston aviatsiya bozorida muhim o‘zgarishlar yuz berdi. 10-mart sanasidan e’tiboran Saudiya Arabistoni hamda Birlashgan Arab Amirliklari yo‘nalishidagi yo‘lovchi tashuvlariga nisbatan o‘rnatilgan barcha sun’iy to‘siqlar rasman bekor qilind, deb yozmoqda “Gazeta.uz” nashri. Transport vazirligining mahalliy va xorijiy aviakompaniyalarga yo‘llagan bildirishnomasi bu boradagi yangi bosqichni boshlab berdi.

Ilgariroq aeronavigatsiya axborot tizimi (NOTAM) orqali e’lon qilingan va 18-martga qadar amal qilishi kutilayotgan cheklovlar muddatidan avval o‘z kuchini yo‘qotdi. Endilikda yo‘lovchilarning fuqaroligi yoki maqomidan qat’i nazar, ikki tomonlama parvozlarni amalga oshirishga to‘liq ruxsat berilgan.

Ziyoratchilar uchun muhim talablar

Umra mavsumining yakunlanishi va yaqinlashib kelayotgan Haj-2026 tadbirlari munosabati bilan Saudiya Arabistoniga yo‘l oluvchilar uchun qat’iy qoidalar joriy etilmoqda. Qirollik qonunchiligiga ko‘ra, barcha ziyoratchilar Haj mavsumi boshlanmasidan avval mamlakat hududini tark etishlari shart.

Shu sababli, Uzbekistan Airports zimmasiga yo‘lovchilarda qaytish aviachiptasi mavjudligini sinchkovlik bilan tekshirish vazifasi yuklatildi. Qaytish chiptasiga ega bo‘lmagan shaxslar haqidagi ma’lumotlar har kuni jamlanib, tahlil qilish uchun “O‘zaviatsiya” agentligiga yuboriladi.

Sayohat tashkilotchilarining mas’uliyati

Hukumatning 2024-yil oktyabrdagi tegishli qaroriga binoan, Umra ziyoratini tashkil etish faqat Din ishlari bo‘yicha qo‘mita litsenziyasiga ega bo‘lgan professional turoperatorlar tomonidan amalga oshirilishi shart. Bu jarayonda turoperatorlar zimmasiga quyidagi majburiyatlar yuklanadi:

• Har bir ziyoratchi uchun alohida borish va qaytish biletlarini rasmiylashtirish.
• Yo‘lovchilarni mehmonxona vaucheri, transfer, ovqatlanish hamda tibbiy sug‘urta hujjatlari bilan to‘liq ta’minlash.
• Ziyoratchilarga belgilangan muddatda aeroportga yetib kelish va tashkilotchi bilan doimiy aloqada bo‘lish tartibini tushuntirish.

Monitoring va nazorat tizimi

Soiradagi tartib-qoidalarni buzgan holda, Saudiya Arabistonidan qaytish biletisiz uchib kelgan yo‘lovchilar holati alohida nazoratga olinadi. “O‘zaviatsiya” agentligi ushbu ma’lumotlarni o‘rganib, zarur hollarda tegishli choralarni ko‘rish uchun Din ishlari bo‘yicha qo‘mita, Turizm qo‘mitasi hamda prokuratura organlariga taqdim etadi.

Transport vazirligi ushbu jarayonning shaffofligini ta’minlash maqsadida vaziyatni doimiy ravishda monitoring qilib borishini ta’kidlamoqda. Bu choralar ziyoratchilarning xavfsizligini ta’minlash va xalqaro huquqiy normalarga rioya etish maqsadida amalga oshirilmoqda.