Абдулла Арипов Эмомали Раҳмон билан учрашди (+видео)

Аввал хабар берилганидек, кеча Абдулла Арипов Савдо-иқтисодий ҳамкорлик бўйича Ҳукуматлараро комиссиянинг 7-йиғилишида иштирок этиш учун 29 сентябрь куни Тожикистон пойтахти Душанбе шаҳрига борди.

Ташриф доирасида Ўзбекистон Республикаси Бош вазири Абдулла Арипов Тожикистон Республикаси Президенти Эмомали Раҳмон билан учрашди.

Қайд этилишича, Ўзбекистон бош вазири Тожикистон Президентига қабул учун миннатдорлик изҳор этиб, Ўзбекистон Республикаси Президенти Шавкат Мирзиёевнинг самимий саломи ва тилакларини етказган.

Эмомали Раҳмон, ўз навбатида, Давлатимиз раҳбари номига ўзининг саломи ва эзгу тилакларини билдириб, Олий даражада эришилган келишувларни амалга оширишда ҳукуматлараро комиссия фаолияти муҳим ўрин тутаётганини таъкидлаган.

Учрашувда икки давлат ўртасидаги сиёсий, савдо-иқтисодий, транспорт-коммуникация, энергетика, қишлоқ ва сув хўжалиги ҳамда бошқа етакчи соҳалардаги ҳамкорлик йилдан-йилга ривожланиб бораётгани қайд этилиб, ўзаро ҳамкорликни ривожлантириш истиқболлари юзасидан фикр алмашилгани айтилмоқда.