Chet elga chiqish uchun 5 yillik alimentni oldindan toʻlash tartibi o‘zgartirilishi mumkin

Prezident aholi murojaatlari bilan ishlash tizimini takomillashtirish yuzasidan videoselektor yig‘ilishida aliment to‘lovchilar chet elga ishlashga borish imkoniyatidan foydalana olmayotganini qayd etdi.

70 ming murojaat 

Ta’kidlanishicha, o‘tgan yili aliment bilan bog‘liq 70 ming murojaat kelib tushgan. Majburiy ijro byurosi aliment bo‘yicha ariza tushsa, undirib berayotgani, lekin aliment to‘lovchining rasmiy daromadi bo‘lmagani uchun murojaatlarning 30 foizi hal qilinmasdan qolayotgani ko‘rsatib o‘tildi.

Bu borada hokimlar aliment to‘lovchilarning qanchasining kasbi bor, lekin ishsiz, qanchasini o‘qitish kerakligini tahlil qilmayotgani, shundan kelib chiqib, bandlik bo‘limi va “mahalla yettiligi” oldiga aniq masala qo‘ymayotgani tanqid qilindi. Hududlarda ishlarni shu tartibda tashkil qilsa, aliment bo‘yicha murojaatlar 2 karra kamayishi mumkinligi qayd etildi.

Chet elga yuborish masalasi koʻrib chiqiladi

Tashkiliy migratsiya asosida odamlarni o‘qitib, chet eldagi yuqori daromadli ishlarga yuborish bo‘yicha tizim yaratildi. Lekin aliment majburiyati bo‘lgan odamlar bu imkoniyatdan foydalana olmayapti, chunki fuqaro chetga chiqishi uchun 5 yillik aliment pulini oldindan to‘lashi yoki aliment oluvchidan yozma rozilik olishi kerak. Mutasaddilarga bu masalani chuqur o‘rganib, tegishli taklif kiritish topshirildi.