“SQB Insurance” суғурта компанияси фаолияти “Ahbor-Reyting” томонидан “Барқарор” деб баҳоланди

“Ahbor-Reyting” рейтинг агентлиги “SQB Insurance”суғурта компанияси Акциядорлик жамияти фаолиятини “Барқарор” прогнози билан (uzA++) баҳолади. “Ahbor-Reyting” МЧЖ рейтинг агентлиги берган баҳо “НИҲОЯТДА ЮҚОРИ” даражадаги тўловга қобилиятлилигини кўрсатиб, “SQB Insurance”суғурта компанияси Акциядорлик жамиятининг ўз мажбуриятларини ўз вақтида ва тўлиқ ҳажмда бажариш қобилиятига эга эканлигини яна бир бор тасдиқлайди.

“SQB Insurance”суғурта компанияси – миллий суғурта бозоридаги энг фаол ва барқарор ўсиб бораётган компаниялардан бири ҳисобланади. Бугунги кунда у юридик ва жисмоний шахсларга кенг турдаги суғурта хизматларини кўрсатиб келмоқда.

Жамият томонидан жойларда очилган 14та филиаллар орқали 50дан ортиқ суғурта хизматларини ўз мижозларига таклиф этиб келаяпти. Янги турдаги суғурта хизматларини ҳам жорий этишга жиддий эътибор қаратилиб, ушбу хизматлар сонини келаётган йилда 60тага етказиш кўзда тутилган.

“SQB Insurance” қайта суғурталаш борасида ҳам катта тажрибага эга бўлиб, бу борада бир қатор ижобий натижаларга эришилган. Жумладан, 28та маҳаллий суғурта компаниялари ҳамда “MOI Broker”(Қозоғистон), СКАЛА брокер”(Россия), “Axiom inre”(Россия), “Страховой брокер Сосьете де Куртаж Ре” “OCEAN International reinsurance company LTD” (Барбадос), “МАЛАКУТ”(Россия) каби суғурта брокерлари билан ҳамкорлик ўрнатилган.

Бу каби молиявий институтлар билан ўрнатилган ўзаро манфаатли бизнес алоқалари компанияга ўз таваккалчиликларини қайта суғурталаш ва қайта суғурталашга қабул қилиш имкониятини яратиб беради. Бу эса ўз-ўзидан бизнес ҳамкорларнинг жамиятга бўлган ишончи янада ошишида хизмат қилади. 

““SQB Insurance”суғурта компанияси” Акциядорлик жамиятининг назорат тизими жамиятнинг молиявий-хўжалик фаолиятига доир барча жабҳаларни қамраб олади, жумладан суғурта операцияларини ҳисобга олиш сиёсати, суғурта захираларидан мақсадли ва самарали фойдаланиш, таваккалчиликни самарали бошқариш, суғурта даъво ишларини тез ва сифатли кўриб чиқиш каби бир қатор ишларни ўз ичига олади.

Мустақил аудиторлар хулосасига кўра, ““SQB Insurance”суғурта компанияси” Акциядорлик жамиятининг назорат тизими сифати “ижобий” деб баҳоланган.

Миллий суғурта бозоридаги ўз ўрнини сақлаб қолиш ва истиқболда уни ошириш мақсадида компания IT-технологияларни қўллаган ҳолда масофавий суғурта хизматларини кўрсата бошлади. Бу эса мижозларга бир қатор енгиллик ва қулайлик яратади. Кўрсатилаётган суғурта хизматларининг сифати, Компанияга миллий ва халқаро рейтинг даражасини оширишга хизмат қилади.

“Ahbor-Reyting” МЧЖ рейтинг агентлигининг таъкидлашича, халқаро ҳамжамият томонидан тўпланган тажриба шуни кўрсатдики, мижозларнинг суғурта компанияси билан ҳамкорлигидан сифатли суғурта хизматларини олиши узоқ йилларга чўзиладиган доимий ўзаро манфаатли муносабатга сабаб бўлади. Суғурта хизматининг сифати юқори даражада баҳоланиши, Суғурта компаниясининг мижозлари ва ҳамкорлари сафи кенгайишига хизмат қилади.