Неймарсиз қолган “Ал Ҳилол” Наманганда “имтиҳон топширади”

Бугун яна бир “Марказий”да, Наманганда халқаро футбол учрашуви бор. Маҳаллий “Навбаҳор” жамоаси Неймарсиз ташриф буюрган “Ал Ҳилол”ни меҳмон қилади. Тошкентнинг “Пахтакор” жамоаси эса Бирлашган Араб Амирликларида “Ал Айн” меҳмони бўлади.

Навбаҳор — Ал Ҳилол

Аввало, наманганликлар ОЧЛ 5-туридан ўрин олган ўйин чиптаси нархини барча секторлар учун бир хилда, 100 минг сўм этиб белгилаганига аниқлик киритсак. Ушбу нарх наманганликлар учун у қадар кутилмаган нарх эмас. Ўйин даражаси ва рақиблар таркибидаги юлдузлар шу нархга арзирли. Бундан ташқари, олинган чипта билан маҳаллий чемпионатнинг сўнгги, ҳал қилувчи турига, “Водий дербиси”га ҳам бепул кириш имконияти мавжуд. Шу жойида клуб маркетинг бўлимининг ишини эътироф этиш керак. Навбатдаги учрашувда кўплаб йўқотишлар бўлишига қарамай Наманган жамоаси ғалаба қозонган тақдирда, кумуш медаль соҳиби бўлиши мумкин. ОЧЛ доирасидаги ўйин ҳам гуруҳда пешқадамликни таъминлайди. Аммо рақиб ўта кучли. Ишонамизки, наманганликлар бутун юртдошларимиз ишончини оқлашади. “Ал Ҳилол” бугун “Марказий” қозонида қоврилади.

Маълумот учун, учрашув 21:00 дан бошлаб “Спорт” телеканали орқали жонли эфирга узатилади. 

Пахтакор — Ал Айн

Дастлабки тур учрашувлари орқали мухлислар кўнглини бироз ҳира қилган ва мамлакат чемпионлигин муддатидан олдин қўлга киритган “Пахтакор” бугун “Ал Айн”ни мағлуб қилишга мажбур. Акс ҳолда, жамоанинг гуруҳдан чиқиш имкониятлари жуда ёмонлашиб, иложсиз ҳолга келиб қолиши ҳам мумкин. 

“Шерлар” ушбу жамоага қарши 5 маротаба ўйин ўтказган. Ўзаро икки ғалаб ва бир дурранг натижа бўлиб олинган. Бугунги ўйин орани очиқ қилиб олиш учун яхши имконият. Таъкидалша жоизки, ўзбек жамоалари ичидан фақатгина “Пахтакор” ушбу жамоани мағлуб эта олган. 

Учрашув 21:00 дан бошлаб “Маҳалла” телеканалида жонли эфирга узатилади.