АҚШ «Аэрофлот»нинг 100 дан ортиқ ходимлари визасини олиб қўйди. Улар контрабандада айбланмоқда

АҚШ давлат департаменти 50 млн. долларлик Apple техникалари контрабандасига алоқадор бўлган «Аэрофлот» ходимларидан 113 нафарининг визасини бекор қилди.

ФҚБ, АҚШ божхона ва чегара хизмати, Нью-Йорк полицияси департаменти ва бошқалар ўрганишлар олиб бориб, якунда 10 кишини 50 млн. АҚШ доллари қийматига эга электрон қурилмалар контрабандасида айблашган.

Нью-Йорк штати Шарқий округи прокуратураси маълумотларига кўра, уларга Россия авиакомпанияси «Аэрофлот»нинг собиқ ва ҳозирги ходимлари ёрдам бериб келишган. Ҳуқуқни муҳофаза қилиш органи ходимлари экипаж аъзоларининг юкларини текшириш вақтида бир неча миллион долларга тенг қурилмаларни топишган.

Қайд этилишича, ноқонуний олиб ўтилаётган буюмлар орасида iPhone, iPad ва Apple Watch соатлари бор. Уларнинг аксарияти ўғирланган.

Мазкур ҳолат ортидан Давлат департаменти «Аэрофлот»нинг 113 нафар ходими визасини бекор қилган. Шунингдек, ҳукумат эълон қилган ҳужжат матнида гумондорларнинг айби исботланмагунча улар айбсиз ҳисобланади дейилган.

Авиакомпания вакилларининг сўзларига кўра, АҚШ контрабандада айблаётган шахсларнинг ҳеч бири аввал ёки ҳозирда ишлаб келаётган ходимлар рўйхатида йўқ. Авиаташувчи вазиятга аниқлик киритиш мақасадида Россиянинг АҚШдаги элчихонаси ва Нью-Йорк бош консуллиги билан ишлаётганини билдирган.