Юнусободда қотиллик. 4 кишини пичоқлаб кетишган

Ижтимоий тармоқларда Тошкент шаҳар, Юнусобод туманида қотиллик содир этилгани, пичоқбозлик рўй бергани ҳақида видеолар тарқалди. Бош прокуратура мазкур ҳолат юзасидан муносабат билдирди.

Аниқланишича, 2020 йил 20 сентябрь куни соат 06:00 ларда Юнусобод тумани, А.Темур кўчасида жойлашган тунги клубидан чиққан шахслар кўчада турган бошқа бир гуруҳ шахслар билан ўзаро жанжаллашган.

Жанжал вақтида улардан бири ёнида бўлган пичоқ билан 4 нафар шахсга бир неча мартотаба тан-жароҳатлари етказиб, ҳодиса жойидан яширинган.

Оқибатда, жароҳатланганлардан 2 нафари вафот этган, қолган 2 нафарининг ҳаёти сақлаб қолинган.

Мазкур ҳолат юзасидан шу куни Тошкент шаҳар прокуратураси томонидан гумонланувчига нисбатан ЖКнинг 97-моддаси 2-қисми “а, л” бандлари, 25,97-моддаси 2-қисми “а, л” бандлари билан жиноят иши қўзғатилган. Гумонланувчи процессуал тартибда ушланган.

Ҳозирда тергов ҳаракатлари олиб борилмоқда.