Наманганда Cobalt ва “тез ёрдам” тўқнашиб кетди. Бир киши вафот этган

Наманган вилояти ИИБ Ахборот хизматининг хабар беришича, 26 июль куни Наманган шаҳрида Damas русумли “тез ёрдам” машинаси ва Cobalt русумли автомобил иштирокида аянчли йўл транспорт ҳодисаси содир бўлган.

Маълум бўлишича, Наманган шаҳрида яшовчи махсус стикерга эга ҳайдовчи 26 июль куни Олмазор кўчасида ўзига тегишли бўлган Cobalt русумли автомашинасини бошқариб кетаётганида ҳаракат хавфсизлигини таъминлай олмай қарама-қарши томондан келаётган Damas русумли "тез ёрдам" машинасига бориб урилган. Натижада Cobalt ҳайдовчиси кўкрак қафаси юмшоқ тўқимаси лат ейиши билан шикастланган.

Тез ёрдам ҳайдовчиси эса оғир қўшма шикаст, бош мия ёпиқ шикасти, ўнг оёқ сон суягининг ёпиқ синиши ташхиси билан шифохонага ётқизилган.

Тез ёрдам автомашинасида йўловчи сифатида кетаётган фуқаро эса оғир тан жароҳати олиб кўрсатилган тез тиббий ёрдамга қарамай шифохонада вафот этган. Ҳозирда ҳолат юзасидан суриштирув ишлари олиб борилмоқда.