Маҳсулотларнинг "яшил сертификатлари" тизими жорий қилиниши кутилмоқда

Президент Шавкат Мирзиёев “яшил” иқтисодиётни ривожлантиришга қаратилган чора-тадбирлар тақдимоти билан танишди.

Тараққиёт стратегиясини 2022 йилда амалга оширишга оид давлат дастурида саноат тармоқларида “яшил” иқтисодиётга ўтиш ва энергия тежамкорлик дастурини ишлаб чиқиш белгиланган эди. Тақдимотда мазкур дастурда кўзда тутилаётган чора-тадбирлар ҳақида ахборот берилди.

Қайд этилганидек, бу ҳужжатда саноат тармоқларида “яшил” иқтисодиётга ўтиш ва энергия тежамкорлигини таъминлаш бўйича концепция белгиланади. Шу асосида 25 та стратегик аҳамиятга эга корхонада ёқилғи-энергетика ресурсларини тежаш мақсадли кўрсаткичлари тасдиқланади.

Бу орқали 2022-2026 йилларда саноат тармоқларида 3,9 миллиард кубометр табиий газни, 4 миллиард киловатт соат электр энергиясини ва 21 минг тонна нефть маҳсулотларини тежаш режалаштирилмоқда. Бунинг натижасида ҳар бир маҳсулот таннархида энергия улушини 20 фоизга камайтириш мақсад қилинган.

2023 йил 1 июндан бошлаб маҳсулотлар экологик тоза энергия ва технологиялар ёрдамида ишлаб чиқарилганини тасдиқловчи “яшил сертификатлар” тизими жорий этилади.

Шу мақсадда иссиқхона газлари чиқарилиши босқичма-босқич тартибга солинади. Бунда табиатга зарарни қисқартириш ишларини давлат томонидан қўллаб-қувватлаш чоралари кўрилади.

“Ифлослантирувчи тўлайди” тамойилини тўлиқ жорий этиш, бу борадаги моддалар рўйхатини кенгайтириш ва йиғим ставкасини ошириш таклиф этилмоқда.

“Яшил” иқтисодиёт бўйича илмий тадқиқотларни кўпайтириш, инновацион лойиҳаларни татбиқ этиш масалаларига алоҳида эътибор қаратилмоқда.

Ҳужжатда белгиланган чора-тадбирлар бажарилишини доимий баҳолаб борувчи гуруҳ ҳам шакллантирилади. Унинг таркибига 15 та халқаро ташкилот ва молия институтлари раҳбарлари киритилади.

Давлат раҳбари бу таклифларни маъқуллаб, ҳар бир тармоқ кесимида энергия тежамкорлигини ошириш, маҳсулот ишлаб чиқаришда энергия харажатини камайтириш бўйича кўрсатмалар берди.