Toshkent viloyatida banklar va tadbirkorlar ishtirokida “Loyihalar yarmarkasi” bo‘lib o‘tdi

Bugun, 14-avgust kuni Toshkent viloyatida O‘zbekiston Respublikasi Markaziy banki tomonidan “Loyihalar yarmarkasi” tashkil etildi.

Bank va biznes bir maydonda

Tadbirda qator tijorat banklari hamda o‘z biznesini rivojlantirish, yangi loyihalarni amalga oshirishni rejalashtirayotgan tadbirkorlar ishtirok etdi.

Yarmarka bank va tadbirkor o‘rtasida bevosita muloqot qilish imkonini berdi: biznes vakillari o‘z loyihalarini taqdim etsa, banklar ularni moliyalashtirish uchun mavjud imkoniyatlarni tanishtirdi.

Tadbirkorlar o‘z loyihalarini namoyish etdi

Yarmarkada tadbirkorlar istiqbolli loyihalari, ishlab chiqarayotgan mahsulotlari va yangi biznes tashabbuslarini taqdim etdi.

Bu format tadbirkorlarga faqat mahsulotini namoyish etish emas, balki loyiha bo‘yicha bank vakillari bilan to‘g‘ridan-to‘g‘ri gaplashish, mavjud moliyaviy yechimlar bilan tanishish imkonini ham berdi.

Banklar qanday imkoniyatlarni taklif qilmoqda?

Tijorat banklari yarmarkada tadbirkorlik subyektlari uchun mo‘ljallangan amaldagi bank mahsulotlari, moliyaviy xizmatlar va biznesni qo‘llab-quvvatlash imkoniyatlarini taqdim etdi.

Tadbirning asosiy maqsadi — istiqbolli biznes tashabbuslarini banklar bilan bog‘lash, yangi loyihalarni moliyaviy qo‘llab-quvvatlash hamda tadbirkorlarga mavjud imkoniyatlar haqida bevosita ma’lumot berish.