Оила ва гендер илмий-тадқиқот институти очилади

Адлия вазирлигининг хабарига кўра, жорий йилнинг 21-декабрида Шавкат Мирзиёев “Оила ва хотин-қизлар қўмитасининг фаолиятини такомиллаштиришга оид қўшимча чора-тадбирлар тўғрисида”ги Фармонни имзолади.

Янги лавозимлар ҳам жорий қилинди

Фармонга кўра, Оила ва хотин-қизлар қўмитаси ваколати Камбағалликни қисқартириш ва бандлик вазирлигидан Вазирлар Маҳкамасига ўтказилди. Қўмита фаолиятини самарали ташкил этиш мақсадида эса Вазирлар Маҳкамасида бош вазир ўринбосари — Оила ва хотин-қизлар қўмитаси раиси лавозими жорий этилди.

Шунингдек, Қўмита раиси билан келишилган ҳолда лавозимга тайинланадиган ва лавозимидан озод этиладиган:

• Қорақалпоғистон Республикаси Вазирлар Кенгаши раиси ўринбосари — Қорақалпоғистон Республикаси Оила ва хотин-қизлар қўмитаси раиси лавозими;
• вилоятлар ва Тошкент шаҳар ҳокимлари ўринбосарлари — вилоятлар ва Тошкент шаҳар оила ва хотин-қизлар бошқармалари бошлиқлари лавозими;
• туман ва шаҳар ҳокимларининг ўринбосарлари — туман ва шаҳар оила ва хотин-қизлар бўлимлари бошлиқлари лавозими киритилди.

Оила ва хотин-қизлар илмий-тадқиқот институти негизида Оила ва гендер илмий-тадқиқот институти ташкил этилди.

Маълумот учун, Оила ва хотин-қизлар қўмитаси 2022 йил 1 мартда ташкил қилинган эди.