Isroil Madrimov WBA chempionlik kamarini qo‘lga kiritdi

Bugun oqshom Saudiya Arabistonining Ar-riyod shahrida katta professional boks oqshomi o‘tkazildi. 

Professional boks oqshomi

Ushbu oqshom doirasida birinchi o‘rta vazn toifasida o‘zbekistonlik professional bokschi Isroil Madrimov WBA chempionlik kamari uchun rossiyalik Magomed Kurbanovga qarshi jang qilib, 12 raund etib belgilangan chempionlik jangining beshinchi raundida hamyurtimiz raqibini nokaut evaziga mag‘lubiyatga uchratib, vakant bo‘lib turgan WBA chempionlik kamarini qo‘lga kiritdi. 

Magomed Kurbanovga "sovg‘a"

Ushbu jang orqali Madrimov Murodjon Ahmadaliyevdan so‘ng chempionlik kamarlarini qo‘lga kiritgan ilk o‘zbekistonlik bokschiga aylandi. Jangning yana bir ahamiyatli jihati, Madrimov prof karerasidagi o‘n birinchi jangida o‘ninchi g‘alabasini nishonladi. Madrimovning hisobida yana bitta durang ham mavjud. Magomed Kurbanov esa bugun faoliyatidagi ilk mag‘lubiyatini qabul qilib oldi. U shu kunga qadar 25 ta jang o‘tkazib, ularning barchasida g‘alaba qozonib kelgan.

Jangdan keyingi fikrlar

Isroil ishtirokidagi jangning natijalariga nazar tashlaydigan bo‘lsak, 4-raund yakuniga ko‘ra, Isroil ballar bo‘yicha ham 2:1 hisobida oldinda borayotgan bo‘lgani ma’lum bo‘ladi. Yangi Jahon chempioni jangdan keyin fikrlarini ingliz va o‘zbek tillarida bildirdi. U chempionlik yo‘lini uzoq bosib o‘tgani, bu yog‘iga ham to‘xtab qolmasligi, barcha to‘rtta chempionlik kamarlarini o‘z qo‘lida birlashtirish asosiy maqsadi ekanini bildirdi. Bu yo‘lda raqiblar Terens Krouford, Jermell Charlo, Tim Szyu bo‘ladimi, buning umuman farqi yo‘qligini aytib o‘tdi. Keyinchalik Twitter messenjerida Isroil Madrimovning so‘zlarini taniqli promouter Eddi Xirn ham tasdiqladi.