Saudiya Arabistonidagi O‘zbekiston fuqarolari ogohlantirildi

O‘zbekistonning Saudiya Arabistonidagi diplomatik vakolatxonalari mintaqada harbiy keskinlik kuchaygani va Ar-Riyod xalqaro aeroportida aviatsiya hodisasi yuz bergani sababli vatandoshlarga murojaat qildi. Elchixona mamlakatda bo‘lib turgan yoki Saudiya Arabistoniga borishni rejalashtirayotgan fuqarolarni xavfsizlik qoidalariga rioya qilishga hamda parvozlar jadvalidagi o‘zgarishlarga tayyor turishga chaqirdi.

Diplomatik vakolatxona ma’lumotiga ko‘ra, Saudiya Arabistoni ichidagi vaziyat barqarorligicha qolmoqda. Biroq mintaqadagi keskinlik va havo hududida ko‘rilayotgan xavfsizlik choralari xalqaro hamda ichki aviaqatnovlarga ta’sir ko‘rsatmoqda. Shu sababli ayrim reyslar kechikishi, bekor qilinishi yoki boshqa yo‘nalishlarga o‘zgartirilishi mumkin.

Yamandagi to‘qnashuvlar yana avj oldi

Yaqin Sharqdagi vaziyat, xususan, Yamanda qurolli qarama-qarshiliklarning kuchayishi mintaqadagi havo qatnovi va xalqaro logistika tizimiga ta’sir qilmoqda. 2022-yilda sulh bitimi tuzilganidan keyin nisbatan pasaygan Yamandagi fuqarolar urushi so‘nggi haftalarda yana keskinlashdi.

Husiylar guruhi Qizil dengiz sohilidagi strategik hududlarni, jumladan, xalqaro dengiz savdosi uchun muhim ahamiyatga ega Bob al-Mandob bo‘g‘ozi yaqinidagi yerlarni nazoratiga oldi.

Bunga javoban Saudiya Arabistoni qo‘llab-quvvatlayotgan Yaman hukumatiga qarashli kuchlar qarshi hujumga o‘tdi. Harbiy harakatlar kengayib borayotgan bir paytda Turkiya va Pokiston “Makka pakti” doirasida Saudiya Arabistoniga o‘z harbiy kontingentlarini joylashtirishi ma’lum qilindi. Shuningdek, Turkiya podshohlikdagi harbiy ishtirokini kengaytirish va u yerda o‘z harbiy bazasini tashkil etish imkoniyatini ham ko‘rib chiqmoqda.

Ar-Riyod aeroportidagi samolyotga jiddiy zarar yetdi

Mintaqadagi harbiy keskinlik Saudiya Arabistoni fuqarolik aviatsiyasi infratuzilmasiga ham ta’sir ko‘rsatdi.

8-oktyabr kuni Yamandagi husiylar tomonidan uchirilgan va havoda tutib olingan ballistik raketa yoki snaryad parchalari Ar-Riyod xalqaro aeroporti terminali yaqinida turgan “Saudia Airlines” aviakompaniyasining samolyotiga kelib tekkan. Shundan so‘ng samolyotda kuchli yong‘in yuzaga kelgan va havo kemasi jiddiy shikastlangan.

Hodisa vaqtida samolyot bortida yo‘lovchilar bo‘lmagan. Aeroport hududidan esa quyuq qora tutun ko‘tarilgan.

Husiylar aeroportga zarba berganini rasman bildirgan. Guruh Saudiya Arabistonining Yaman hukumatini qo‘llab-quvvatlashiga javoban keyinchalik mamlakatdagi energetika obyektlarini ham nishonga olishi mumkinligi haqida ogohlantirgan.

Saudiya rasmiylari ma’lumotiga ko‘ra, havoda tutib olingan raketa parchalari Ar-Riyoddagi bolalar bog‘chasi va tibbiyot majmuasi hududiga ham tushgan.

Hafta davomida Ar-Riyod va mamlakatning janubi-g‘arbida joylashgan Abha aeroportlariga qilingan hujumlar oqibatida jami uch kishi halok bo‘lgan, yana 36 kishi turli darajada jarohat olgan.

Xalqaro aviakompaniyalar parvozlarni to‘xtatmoqda

Xavfsizlik bilan bog‘liq tahdidlar ortidan “Lufthansa” va “Air India” kabi yirik xalqaro aviakompaniyalar Ar-Riyodga parvozlarni vaqtincha to‘xtatishini ma’lum qildi.

“Cirium” aviatsiya tahliliy kompaniyasi ma’lumotlariga ko‘ra, 8-oktyabr kuni Ar-Riyod aeroportidan amalga oshirilishi rejalashtirilgan reyslarning deyarli yarmi bekor qilingan. Cheklovlar keyingi kunda ham davom etishi kutilmoqda: 9-oktyabr kuni Saudiya Arabistoni aeroportlarida yana 31 ta reys bekor qilinishi prognoz qilingan.

Havo hududida amalga oshirilayotgan xavfsizlik choralari parvozlar jadvali, yo‘nalishlar va tranzit tartiblariga o‘zgarishlar kiritilishiga sabab bo‘lmoqda. Natijada yo‘lovchilar reyslarning kechikishi, bekor qilinishi yoki muqobil parvozlarga o‘tkazilishi bilan duch kelishi mumkin.

Bundan tashqari, tranzit yo‘nalishlarining o‘zgarishi va aeroportlarda kutish vaqtining uzayishi safarning umumiy davomiyligiga ham ta’sir ko‘rsatmoqda.

O‘zbekiston fuqarolariga qanday tavsiyalar berildi?

O‘zbekistonning Saudiya Arabistonidagi elchixonasi mamlakatda bo‘lib turgan va u yerga borishni rejalashtirayotgan vatandoshlarga xavfsizlik choralariga jiddiy e’tibor qaratish zarurligini eslatdi.

Diplomatik vakolatxona ta’kidlashicha, Saudiya Arabistoni ichidagi vaziyat barqaror bo‘lib, mamlakat hududida jamoat xavfsizligiga bevosita tahdidlar yoki maxsus cheklov choralari qayd etilmagan. Shunga qaramay, mintaqadagi umumiy vaziyat sababli ehtiyot choralarini ko‘rish lozim.

Elchixona fuqarolarga quyidagi tavsiyalarni berdi:

— Saudiya Arabistoni va Yaman o‘rtasidagi chegara hududlariga yaqin bormaslik;

— mahalliy hokimiyat organlari belgilagan xavfsizlik talablari va tartib-qoidalariga qat’iy rioya qilish;

— harbiy obyektlar, harbiy texnika va yuz bergan noxush hodisalar oqibatlarini foto yoki videoga olmaslik;

— tekshirilmagan va norasmiy xabarlarni tarqatmaslik, axborot olishda faqat rasmiy manbalarga tayanish;

— shaxsni tasdiqlovchi hujjatlar va safar uchun zarur hujjatlarni doimo yonida olib yurish.

Shuningdek, Saudiya Arabistoniga safar qilishni rejalashtirayotgan fuqarolarga parvozlar jadvali va tranzit tartibidagi o‘zgarishlarni hisobga olish tavsiya etiladi. Reyslar kechikishi, bekor qilinishi yoki yo‘nalishlar o‘zgarishi mumkinligi sababli safar oldidan aviakompaniyalar taqdim etayotgan rasmiy ma’lumotlarni tekshirib borish muhim.

Favqulodda vaziyatda qayerga murojaat qilish mumkin?

O‘zbekiston fuqarolari Saudiya Arabistonida favqulodda vaziyat yuzaga kelganida yoki yordamga ehtiyoj tug‘ilganida mamlakatdagi diplomatik vakolatxonalarga quyidagi aloqa raqamlari orqali murojaat qilishlari mumkin.

O‘zbekistonning Ar-Riyoddagi elchixonasi:

Statsionar telefon: +966 11 263 52 23.

Konsul Shuhrat Ibragimov: +966 56 721 77 31. Ushbu raqam orqali Telegram va WhatsApp messenjerlarida ham bog‘lanish mumkin.

O‘zbekistonning Jiddadagi Bosh konsulxonasi:

Statsionar telefon: +966 12 607 72 50.

Konsul Azimjon Qobiljonov: +966 59 439 08 50. Ushbu raqam orqali ham Telegram va WhatsApp messenjerlaridan foydalanish mumkin.

Diplomatik vakolatxonalar fuqarolarni rasmiy xabarlarga tayanishga, xavfsizlik talablariga rioya qilishga va safar bilan bog‘liq o‘zgarishlarni oldindan tekshirib borishga chaqirmoqda.