Ўзбек-туркман чегарасида отишма рўй берди

17 cентябрга ўтар кечаси Ўзбекистон ва Туркманистон чегарасида отишма рўй берди, дея хабар бермоқда "Хроника Туркменистана" нашри.

Маълум бўлишича, Туркманистоннинг Фараб этрапи ва Ўзбекистоннинг Олот тумани ўртасидаги давлат чегараси қисмида ўтказилган рейд вақтида Аму-Бухоро каналида ҳарбийлар резина эшкакли қайиқда юк ташиётган одамларни пайқашган.

Чегарачилар дастлаб ҳавога огоҳлантирувчи ўқ узишган. Қарама-қарши соҳилдан номаълум фуқаро, тахминларга кўра, помпали милтиқдан Туркманистон томонга ўқ узган. Шундан сўнг, икки томон ўртасида бир неча маротаба бир-бирларига қарата ўт очишган. Воқеа натижасида ҳеч ким шикастланмаган.

Туркманистон ҳарбийлари 50та катта қутидаги Россияда ишлаб чиқарилган сигаретни ноқонуний олиб ўтмоқчи бўлган Туркманистон фуқаросини қўлга олишган.

Ўзбекистон томони ҳозирча мазкур ҳолат юзасидан ҳеч қандай расмий маълумот бермади.