Ўзбекистон Pfizer вакцинасининг яна 143 мингга яқин дозасини қабул қилди

Ўзбекистонга коронавирусга қарши Pfizer вакцинасининг қарийб 143 минг дозаси келтирилди. Декабрь ойида яна 3 млн доза вакцина келиши кутилмоқда.

Душанба куни Ўзбекистонга Pfizer вакцинасининг 142 740 дозаси етиб келди, деб хабар берди Соғлиқни сақлаш вазирлиги матбуот хизмати.

COVAX дастури доирасида етказилган вакцинани БМТнинг Болалар жамғармаси моддий-техник ёрдам сифатида тақдим қилди.

ЮНИСEФ маълумотларига кўра, декабрь ойида Ўзбекистонга Pfizer вакцинасининг яна 3 млн дозаси келади.

Бугунги кунга қадар мамлакатда эмлаш жараёнида жами 72,5 млн доза вакцина қўлланилган бўлиб, шундан 6,7 миллиони Pfizer вакцинасидан олинган.

Эслатиб ўтамиз, июль ойида Ўзбекистонга 2 млн дозада Pfizer вакцинаси етказиб берилганди. Эмлаш воситалари Қўшма Штатлар томонидан COVAX дастури доирасида юборилганди.