Тарихий гол урилган ўйинда терма жамоамиз мағлуб бўлди

Учрашувнинг биринчи бўлими меҳмонларнинг кичик устунлигида ўтди. Бўлим якунланиши арафасида Сардор Азмун жарима майдони ташқарисидан аниқ зарба йўллаган ҳолда ҳисобни очди. Иккинчи бўлим дебютида форслар пенальти ишлаб олишга эришди. 11 метрлик жарима зарбасини Меҳди Тареми аниқ амалга оширди. Элдор Шомуродов Санжар Қодирқуловнинг узатмасидан кейин ҳисобни қисқартирди. Ўйиннинг қолган қисмида ҳисоб ўзгармади.

Ўзбекистон терма жамоасининг голи Эрон термасига Тошкентда урилган биринчи гол бўлди. Элдор Шомуродов эса форсларга тўп киритган иккинчи ўзбекистонликка айланди ва шу орқали Элдор терма жамоадаги голлари сонини 20 тага етказиб олди.

Учрашувдан сўнг ташкил этилган матбуот анжуманида термамиз бош мураббийи Вадим Абрамов қуйидаги фикрларни билдириб ўтди: «Тушунарлики Эрон жуда тажрибали жамоа. Бугун имкониятимиздан пастроқ ўйнадик. Агар биринчи таймда бироз яхши ҳаракат қилган бўлсак, иккинчи тайм сўнгги 30 дақиқасида жуда ёмон ўйнадик. Эрон биринчи бўлимда икки марта зарба берди ва гол урди. Афсуски бугун кутган ўйинимизни намойиш этолмадик. Бундай кучли рақиб фонида футболчиларни синаб кўрдик. Бу баҳс биз учун фойдали бўлади, мағлуб бўлганда футболчиларга айтадиган гапларим кўп бўлади».

Вакилларимиз кейинги ўйинни 12 октябрь куни Дубай шаҳрида БАА терма жамоасига қарши ўтказади.

Спорт оламидаги қайноқ ҳабарлар бу ерда.