UzAuto Motors онлайн шартнома беришни бошлайди

UzAuto Motors Chevrolet Cobalt, Damas ва Labо автомобиллари учун контрактация очилишини маълум қилди.

Хабарда қайд этилишича, бугун соат 12:00 дан бошлаб 2024 йилда ишлаб чиқарилиши режалаштирилган Chevrolet Cobalt, Damas ва Labо автомобилларининг бутун ҳажми учун онлайн контрактация очилади. Автомобиль харид қилиш учун шартномани фақатгина онлайн тарзда расмийлаштириш мумкин. Компания яна шуни таъкидладики, шу кунларда барча Chevrolet дилерлик марказлари савдо тизимидан ўчирилади ва автосалонларнинг барчаси ёпиқ бўлади. 

Қаердан харид қилинади?

Chevrolet оммабоп автомобиллари учун шартнома тузиш фақат UzAutoSavdo иловаси, шунингдек savdo.uzavtosanoat.uz сайти орқали амалга оширилиши мумкин. Telegram бот фақат навбатни кузатиш хизматини ҳамда мавжуд автомобиллар ҳақида маълумотни тақдим этади. Компания харидорлардан асоссиз “ажиотаж” чиқармасликни сўраб, контрактация учун Chevrolet Cobalt, Damas ва Labo автомобилларининг 2024 йилдаги бутун ҳажми мавжуд бўлишини таъкидлади. 

Ҳушёр бўлинг!

Компанияси ўз мижозларидан ҳушёр бўлишни ва шахсий маълумотларини, айниқса, давлат порталидаги шахсий маълумотларни учинчи шахсларга бермасликни сўраб, агарда шартнома тузиш учун шахсий маълумотларингизни учинчи шахсларга топширадиган бўлсангиз, компания сизнинг олдингизда ҳеч қандай жавобгарликни ўз зиммасига олмайди. Онлайн шартнома тизими барча учун мутлақо бепул ва тизимда ҳеч ким учун қандайдир алоҳида киришни таъминлайдиган имкон йўқ.

Онлайн харид қилиш тартиби қандай?

1. OneID (https://id.egov.uz/oz) тизимида рўйхатдан ўтиш керак; 

2. "УзАутоСавдо" мобил иловасини юклаб олиш ёки savdo.uzavtosanoat.uz сайтига кириш лозим;

3. OneID тизимидаги логин ва пароль ёрдамида сайтга кириш ёки иловада рўйхатдан даркор;

4. Автомобиль модели, ранги ва комплектатсияси ҳамда маъқул келган дилерлик марказини танлаган ҳолда, шартнома тузиш керак бўлади.