UFC Fight Night 282: Ramazon Temirovda g‘alaba, Bogdan Guskovda mag‘lubiyat

Birlashgan Arab Amirliklarining Abu-Dabi shahrida o‘tkazilgan “UFC Fight Night 282” turniri o‘zbekistonlik MMA ishqibozlari uchun haqiqiy sport bayramiga aylandi. Mazkur kechaning ikkita markaziy jangining har ikkisida o‘zbekistonlik ikki sportchi — Ramazon Temirov hamda Bogdan Guskov oktagonga ko‘tarildi.

Ramazon Temirovning shiddatli g‘alabasi

Kechaning ikkinchi asosiy uchrashuvi — “co-main event” doirasida 29 yoshli hamyurtimiz Ramazon Temirov oktagonga chiqdi. Unga o‘ta yengil vazn toifasida UFC reytingida 10-o‘rinni egallab turgan, ikki bor chempionlik kamari uchun da’vogarlik qilgan va yaqin o‘tmishda, ya’ni 2024-yilning may oyida Aleshandre Pantoja bilan munosib jang olib borgan avstraliyalik tajribali sportchi Stiv Erseg raqiblik qildi.

Jang start olgan ilk soniyalardanoq Temirov tashabbusni o‘z qo‘liga oldi va tajribali raqibiga doimiy ravishda kuchli bosim o‘tkazishni boshladi. Stoyka holatida aniq hamda zalvorli zarbalar bera olgan Ramazon Ersegning mudofaasidagi bo‘shliqlarni izladi hamda tinimsiz oldinga harakat qildi. Bellashuvning hal qiluvchi pallasi birinchi raund tugashiga 40 soniya qolganida yuz berdi. Temirov yo‘llagan kuchli va aniq zarba Ersegni muvozanatdan chiqardi. Shundan so‘ng hamyurtimiz shiddatli va ketma-ket hujumlarni davom ettirib, raqibini muddatidan ilgari mag‘lubiyatga uchratdi. Referi bahsni birinchi raundning 4-daqiqasiyu 20-soniyasida to‘xtatib, texnik nokautni qayd etdi.

Ushbu muvaffaqiyat Ramazon Temirov uchun UFC dagi ketma-ket uchinchi g‘alaba bo‘ldi. Bunga qadar u Si Jey Vergarani muddatidan oldin, Charlz Jonsonni esa hakamlar qaroriga ko‘ra mag‘lub etgan edi. Bu natijadan so‘ng Temirovning professional rekordidagi ko‘rsatkich 20 g‘alaba va 3 mag‘lubiyatga yetdi. Shuningdek, mazkur nokaut uning faoliyatida birinchi raundning o‘zidayoq qo‘lga kiritilgan 11-g‘alaba sifatida qayd etildi. 30 yoshli Stiv Erseg esa o‘z faoliyatidagi beshinchi mag‘lubiyatini tan olishga majbur bo‘ldi.

Jang yakunlangach, Ramazon Temirov oktagonning o‘zida amaldagi UFC chempionini ochiqchasiga jangga chorladi hamda O‘zbekiston Respublikasi Prezidentiga o‘zining maxsus murojaatini yo‘lladi.

Bogdan Guskov va Magomed Ankalayev o‘rtasidagi keskin toqnashuv

“UFC Fight Night 282” turnirining markaziy jangi esa yarim og‘ir vazn toifasi reytingida 9-pog‘onani band etib turgan o‘zbekistonlik Bogdan Guskov hamda sobiq chempion va titul uchun birinchi raqamli da’vogar Magomed Ankalayev o‘rtasida kechdi.

Bogdan ushbu mas’uliyatli jangga jarohat olgan Xalil Rauntrining o‘rniga, qisqa fursat ichida berilgan taklif va eslatmaga rozilik bildirgan holda yetib kelgandi. Uchrashuvning dastlabki raundlari har ikki sportchi tomonidan ancha ehtiyotkorlik bilan boshlandi. Ankalayev o‘zining odatiy taktik uslubiga sodiq qolgan holda ochkolar jamg‘arishga e’tibor qaratdi va Guskovning oyoqlariga past zarbalar berish orqali uning faol harakatlanishini cheklashga urindi. Guskov esa o‘z navbatida xavfli qarshi zarbalarni yo‘llash uchun qulay imkoniyat kuta boshladi, biroq Ankalayevning masofani doimiy nazorat qilib jang olib borishi unga o‘z salohiyatini to‘liq namoyon etishga yo‘l qo‘ymadi.

Uchinchi raundga kelib, tribunalardagi tomoshabinlar jangning sust va passiv kechayotganidan norozi ekanliklarini bildirib, hushtakbozlik qilishni boshlashdi. Ammo to‘rtinchi raunddan e’tiboran oktagondagi manzara tubdan o‘zgardi. Ankalayev kurash elementlarini ishga solib, Guskovni parter holatiga o‘tkazdi va u yerda mutlaq ustunlikni o‘z qo‘liga oldi. Beshinchi raundda Bogdan Guskov “anakonda” bo‘g‘ish usulini qo‘llashga harakat qilib ko‘rdi, lekin Ankalayev bu vaziyatdan qiyinchiliksiz chiqib ketdi va raqibiga parterda “graund-end-paund” texnikasini qo‘llagan holda shafqatsiz zarbalar berishni davom ettirdi. Oqibatda referi Mark Goddard uchrashuvni to‘xtatishga majbur bo‘ldi va Ankalayev texnik nokaut evaziga g‘alabani qo‘lga kiritdi. Mazkur zafar Ankalayevning chempionlik kamari uchun qayta da’vogarlik qilish imkoniyatini yanada mustahkamladi.