Ucell'ning ikki abonentiga S26 sovg‘a qilindi

Har bir yangi tarmoq foydalanuvchisiga sifatli xizmat ko‘rsatish ortida ulkan texnik yechimlar, uzluksiz barpo etilayotgan infratuzilma va yuzlab sohasi mutaxassislarining mehnati yotadi. Amaliy sa’y-harakatlar natijasida Ucell kompaniyasi navbatdagi muhim ko‘rsatkichga erishdi — Toshkent shahri va Toshkent viloyati bo‘yicha abonentlar soni 3 million kishini tashkil etdi. Ushbu sanaga bag‘ishlanib o‘tkazilgan tantanali marosimda yubiley mijozlarga zamonaviy Samsung S26 smartfonlari topshirildi. Bu tadbir operator tarmog‘ini tanlayotgan barcha foydalanuvchilarga ko‘rsatilgan minnatdorlik ramzi bo‘ldi.

Raqamlarda aks etgan ko‘rsatkichlar va tarmoq kengayishi

Tashkiliy va texnik yondashuvlar ish samaradorligini sezilarli darajada oshirish imkonini berdi. 2026-yilning dastlabki olti oyida Toshkentdagi Ucell abonentlari tomonidan jami 309,8 million gigabayt mobil internet-trafiki sarflandi. Taqqoslash uchun, bu hajm taxminan 52 millionta film yoki futbol uchrashuvini tomosha qilish, 77 milliardta musiqani tinglash yoxud 155 milliardga yaqin elektron kitobni yuklab olishga tengdir.

Shu bilan birga, 4G tarmog‘idagi trafik hajmi 11,3 foizga, 5G tarmog‘ida esa 27,9 foizga o‘sgani kuzatildi. Bu raqamli xizmatlarga bo‘lgan talabning muttasil ortib borayotganini ko‘rsatadi.

Yilning birinchi yarmi davomida kompaniya poytaxtda 500 ga yaqin 4G va 5G tayanch stansiyalarini topshirdi. Natijada beshinchi avlod tarmog‘ining qamrovi yana 21 foizga kengaydi, shahardagi 5G stansiyalari soni esa joriy yilda 250 tadan oshdi.

Toshkentning barcha tumanlarida 4G va 5G tarmoqlari qamrovi hamda sig‘imini oshirish bo‘yicha ishlar davom etmoqda. Shuningdek, Toshkent viloyatining Parkent, Olmaliq, Ohangaron, Angren, Bo‘stonliq, Qibray va Chirchiq shaharlarida 4G tarmog‘i modernizatsiya qilindi.

Ichki obyektlar qamrovi va yuqori yuklamalarga tayyorgarlik

Tashqi stansiyalarni qurish bilan birga, kompaniya bino ichida sifatli aloqani ta’minlovchi indoor-qoplama tizimini faol rivojlantirmoqda. Hozirgi kunda zamonaviy aloqa infratuzilmasi Yangi onkologiya markazi, poytaxtdagi yirik savdo majmualari, dam olish maskanlari hamda “Korzinka” supermarketlar tarmog‘ida faoliyat yuritmoqda. Hozirda yirik turar joy majmualari va biznes markazlarini barqaror aloqa bilan ta’minlash choralari ko‘rilmoqda.

Tarmoq ishonchliligi 2026-yilgi futbol bo‘yicha Jahon chempionatiga tayyorgarlik jarayonida ham namoyon bo‘ldi. O‘yinlar o‘tkazilgan davrda tarmoq sig‘imi va barqarorligini oshirish bo‘yicha kompleks tadbirlar amalga oshirildi. Buning sharofati bilan abonentlar tarmoqqa tushgan eng yuqori yuklama paytlarida ham onlayn translyatsiyalarni to‘siqsiz kuzatish va raqamli xizmatlardan samarali foydalanish imkoniga ega bo‘ldilar.

Texnologik baza va tolali-optik tarmoqlar

Bugungi kunda poytaxt va Toshkent viloyatidagi aloqa obyektlarining 50 foizdan ortig‘i tolali-optik aloqa liniyalari orqali ulangan. Bu ma’lumotlarni yuqori tezlikda uzatish hamda 4G va 5G tarmoqlarining barqaror ishlashini ta’minlaydigan omildir. Kompaniya o‘zining tolali-optik infratuzilmasini kengaytirishni davom ettirmoqda: shahar va hudud ichidagi tolali-optik aloqa liniyalarining umumiy uzunligi 1300 kilometrdan oshgan.

Biznes yechimlari va ijtimoiy mas’uliyat

Kompaniya chakana savdo tarmog‘ini izchil kengaytirib, jismoniy va korporativ mijozlar uchun yangi raqamli servislarni joriy etmoqda. Biznes sohasi uchun qurilmalarni boshqarish va jarayonlarni avtomatlashtirishga mo‘ljallangan M2M-platformasi hamda ko‘chma xodimlar faoliyatini real vaqt rejimida muvofiqlashtirishga yordam beruvchi “Kadrlar nazorati” servisi taqdim etilmoqda.

Shuningdek, ijtimoiy tashabbuslar doirasida “Yashil makon” loyihasida amaliy qadamlar tashlandi — “Ucell-Toshkent” hududiy bo‘limi xodimlari tomonidan 200 tupdan ortiq daraxt ekildi. Bu telekommunikatsiya infratuzilmasini rivojlantirish atrof-muhit muhofazasi bilan birga olib borilayotganini ko‘rsatadi.

Kelgusi maqsadlar va ko‘rsatkichlar tahlili

“Ucell-Toshkent”ning asosiy maqsadi — Toshkent shahridagi 1-raqamli operatorga aylanishdan iborat. Toshkent shahrida 2 million va Toshkent viloyatida 1 million abonent ko‘rsatkichiga erishilgani kompaniya tomonidan tanlangan rivojlanish strategiyasining amaliy samarasidir.

Ushbu natijalar ortida kundalik faoliyatida Ucell xizmatlariga tayanadigan millionlab foydalanuvchilar turibdi. Bildirilgan ishonch kompaniya uchun zamonaviy raqamli texnologiyalar, sifatli mobil aloqa va servis darajasini mamlakat aholisi uchun yanada qulay qilish yo‘lidagi asosiy omil bo‘lib qolmoqda.

Reklama huquqlari asosida