Ўзбекистон мезбонлик қиладиган U-19 Осиё чемпионатини юқори даражада ўтказиш белгиланди

Вазирлар Маҳкамасининг Ўзбекистон мезбонлиқ қиладиган футбол бўйича 2020 йилги U-19 Осиё чемпионатини юқори савияда ташкил этиш ва ўтказиш бўйича тегишли фармойиши имзоланди.

Унга кўра, мусобақага тайёргарлик кўриш ва уни ўтказиш билан боғлиқ харажатлар сметаси тасдиқланди.

Осиё чемпионати ўтказиладиган жойларнинг санитария қоидалари, нормалари ва гигиена нормативларига мос бўлиши, иштирокчиларга юқори савияда тиббий хизматлар кўрсатилиши, меҳмонхоналар ва ўйингоҳлар зарур тиббий анжомлар, дори воситалари ҳамда тез ёрдам автомашиналари навбатчилиги ташкил этилиши Ўзбекистон Соғлиқни сақлаш вазирлиги томонидан таъминланади.

Хорижий давлатлардан ташриф буюрадиган иштирокчилар ҳамда меҳмонларни кузатиб бориш учун чет тилларини мукаммал биладиган кўнгилли талабалар жалб этилади.

«Uzbekistan Airports» акциядорлик жамияти Ўзбекистон футбол ассоциацияси буюртмасига мувофиқ, тегишли халқаро аэропортларда мусобақа иштирокчилари ҳамда меҳмонларини белгиланган тартибда кутиб олиш ва кузатишни ташкил этади.

Эслатиб ўтамиз, U-19 Осиё чемпионати 14-31 октябрь кунлари Тошкент шаҳри, Тошкент ва Наманган вилоятларида бўлиб ўтади.

Тимур Кападзе бошчилигидаги Ўзбекистон ёшлар терма жамоаси «А» гуруҳида Эрон, Индонезия ва Камбожа билан баҳсларга қиришади.

Мазкур турнирнинг ярим финалига етиб борган жамоалар 2021 йилда Индонезияда бўлиб ўтадиган U-20 Жаҳон чемпионатига тўғридан-тўғри йўлланмани қўлга киритади.