Endi moped va skuterlar uchun alohida davlat raqami belgilari boʻladi

O‘zbekistonda moped va skuterlar uchun alohida davlat raqami belgilari joriy etilishi ko‘zda tutilyapti. Bu haqda “Foydalanishda bo‘lgan moped yoki skuterlarni davlat ro‘yxatidan o‘tkazish bo‘yicha vaqtinchalik nizomni tasdiqlash haqida”gi hukumat qarori loyihasida keltirilgan.

1-iyuldan boshlanadi

Qayd etilishicha, dvigatelining ish hajmi 25 sm3 va undan ortiq, lekin 50 sm3dan oshmaydigan, shuningdek, elektrodvigatelining quvvati 0,25 kilovatt va undan ortiq, lekin 4 kilovattdan oshmaydigan, konstruktiv tezligi soatiga 25 kilometr va undan ortiq, lekin 50 kilometrdan oshmaydigan transport vositalari (moped va skuter) uchun alohida ro‘yxatdan o‘tkazish davlat raqami belgilari joriy etiladi va 2024- yil 1-iyuldan boshlab bu turdagi yangi transport vositalari umumiy tartibda, foydalanishda bo‘lganlari vaqtinchalik nizom asosida davlat ro‘yxatidan o‘tkaziladi.

Toʻlovlarni online amalga oshirish

Xuddi shu davrdan boshlab:

Avtomototransport vositalarini davlat ro‘yxatidan o‘tkazish va ularga ro‘yxatdan o‘tkazish davlat raqami belgilarini berish bilan bog‘liq murojaatlarni Yo‘l harakati xavfsizligi xizmatining mobil ilovasi, veb-sayti, Call-markazi yoki Yagona interaktiv davlat xizmatlari portali orqali yuborish va to‘lovlarni onlayn amalga oshirish;

ro‘yxatdan o‘tkazish davlat raqami belgilarini Yo‘l harakati xavfsizligi xizmatining Yagona avtomatlashtirilgan axborot tizimidagi “Davlat raqam belgilari” modulida avtomatik tarzda tasodifiy tanlash yo‘li bilan berish tartiblari joriy etilishi mo‘ljallanmoqda.

Hisob-ma’lumotlarielektron shaklda beriladi

"2024-yil 1-iyulga qadar moped va skuterlarni sotish faoliyati bilan shug‘ullanuvchi maxsus savdo tashkilotlar (ishlab chiqaruvchi, uning vakili yoki vositachi) Yo‘l harakati xavfsizligi xizmatining Yagona avtomatlashtirilgan axborot tizimi “Transport vositalari hisob ma’lumotnomalari” moduliga 

integratsiya qilinadi va bunday transport vositalari uchun hisob-ma’lumotlarni elektron shaklda berilishini ta’minlasin", deyiladi mazkur qaror loyihasida.

2025-yil 1-yanvardan boshlab esa ro‘yxatga olinmagan bu turdagi transport vositalaridan foydalanish taqiqlanadi.