Tadqiqot: Smartfonlar o‘quvchilarning o‘quv jarayoniga salbiy ta’sir ko‘rsatmaydi

So‘nggi paytlarda maktablarda smartfonlardan foydalanishni to‘liq taqiqlash masalasi ko‘p muhokama qilinyapti. Lekin o‘tkazilgan so‘rovlarga ko‘ra, 82% o‘qituvchilar bunday taqiq o‘quvchilarning xulqiga ijobiy ta’sir ko‘rsatmasligini ta’kidlashmoqda. Ularning fikricha, smartfonlar qo‘pol xulq-atvor yoki o‘qishga nisbatan e’tiborsizlikning asosiy sababi emas.

O‘quvchilarning bir-biri bilan o‘zaro so‘zlashishi ko‘proq halaqit beradi

Ma’lum qilinishicha, o‘qituvchilarning aksariyati smartfonlardan ko‘ra o‘quvchilarning o‘zaro gaplashishi va diqqatsizligi dars jarayoniga ko‘proq halaqit berishiga ishonadilar. Shu bilan birga, 41% pedagoglar smartfonlarning ta’limda foydali bo‘lishi mumkinligini qayd etishgan. Masalan, turli ta’lim ilovalari va onlayn manbalar o‘quv jarayonini qiziqarli va samarali qilishga yordam beradi.

Shuningdek, masalaning yana bir muhim jihatini unutmaslik kerak: to‘liq taqiq joriy qilingan taqdirda, bu bolalarni texnologiyadan butunlay uzib qo‘yish ehtimolini tug‘diradi.

Texnologiyani to‘liq taqiqlash yechim emas

Bu esa zamonaviy dunyo talablariga mutlaqo mos kelmaydi. Bugungi kunda raqamli savodxonlikning ahamiyati oshib borayotgani bois, bolalarga texnologiyalardan to‘g‘ri foydalanishni o‘rgatish muhimroq bo‘lib qolyapti.

Maktablarda to‘liq taqiq o‘rniga, smartfonlardan foydalanishning aniq qoidalarini belgilash, ularni ta’lim jarayoniga integratsiya qilish va bolalarga texnologiyani madaniyatli va samarali qo‘llashni o‘rgatish orqali muammoni samarali hal qilish mumkin. Bu nafaqat o‘qitish sifatini oshiradi, balki o‘quvchilarni XXI asr malakasini o‘zlashtirishga tayyorlaydi.