Нукусда “Шумахерлар” пайдо бўлди (видео)

Ижтимоий тармоқда Қорақалпоғистоннинг Нукус шаҳрида йўлнинг қарама-қарши томонида рақамсиз Cобалт катта тезликда дрифт қилиб юргани акс этган видео тарқалди. Ҳолатга ойдинлик киритиш мақсадида “Дарё” мухбири Қорақалпоғистон ЙҲХБ билан боғланди.

Бошқарма матбуот хизмати раҳбари Турсинбай Ўтемуратовнинг “Дарё” мухбирига маълум қилишича, ҳолат Нукуснинг Ўзбекистон (собиқ Тўрткўл) гузарида кузатилган. Ҳозирги вақтда Cобалт билан бирга видеони тасвирга олган Нехиа-3 ҳайдовчиси ҳам қидирилмоқда.

Турсинбай Ўтемуратовнинг қўшимча қилишича, машиналар рақамсиз ҳаракатлангани учун уларни топиш ишлари бироз вақтни олиши мумкин. Аммо айни вақтда бутун Нукусдаги камера ёзувлари текширилмоқда.

Бундан бир муддат олдин Қорақалпоғистондаги тўйда танасини машинадан чиқариб тасвирга олган операторлар ва ҳайдовчи жаримага тортилганди.