“Roma” bosh murabbiyi: “Men shu yerda ekanman, Shomurodovning transferi haqida gap bo‘lishi mumkin emas”

“Roma” futbol klubining bosh murabbiyi Klaudio Ranуeri “Udineze” bilan o‘yindan keyingi matbuot anjumanida 29 yoshli Eldor Shomurodovning transferi haqida ham fikr bildirdi.

“Men Shomurodov kabi professional o‘yinchi bilan ishlashdan xursandman”

“Men shu yerda ekanman, Shomurodovning transferi haqida gap bo‘lishi mumkin emas, bu yigitlardan foydalanishda davom etaman. Men uning imkoniyatlarini yaxshi bilaman, Eldor bilan “Kalyari”da ishlaganman. Bu o‘yinda u maydonning chuqur qismidan hujumlarni tashkil etishda katta qat’iyat namoyish etdi. Men Shomurodov kabi professional o‘yinchi bilan ishlashdan xursandman”, – dedi u.

Italiya chempionatining 22-turi doirasidagi “Udineze” – “Roma” o‘yinining ikkinchi taymi davomida maydonga tushgan Eldor Shomurodov rimliklar g‘alabasiga munosib hissa qo‘shib, uning kelajak karyerasi haqidagi bir qator savollarga nuqta qo‘ydi. О‘yin “Roma”ning 2:1 hisobidagi g‘alabasi bilan yakunlangan edi.

Futbolchining klub bilan shartnomasi kelgusi yilda tugaydi

Ma’lumot uchun, ilgari o‘zbekistonlik hujumchi qishki transfer oynasida jamoani tark etishi mumkinligi xabar qilingan edi.

Umuman olganda Shomurodov 2021-yilning yozida Rim klubiga ko‘chib o‘tganidan beri har transfer oynasi arafasida “Roma”ni tark etishi haqida xabarlar tarqatiladi. Xususan, yozda ham klub 29 yoshli hujumchi bilan xayrlashishga yaqin turgandi, lekin o‘sha paytdagi bosh murabbiy Daniele De Rossi kutilmaganda Eldor haqidagi fikrini o‘zgartirib, uni jamoada olib qolgandi.

29 yoshli hujumchi joriy mavsum “Roma” tarkibida 15 o‘yin o‘tkazib, 2 ta gol urdi va 1 ta golga assistentlik qildi. Eldorning rimliklar bilan shartnomasi 2026-yilning 30-iyunigacha mo‘ljallangan.