Roʻzadorlarning noto‘g‘ri ovqatlanishi salomatlikka jiddiy zarar yetkazishi mumkin

Ramazon oyida noto‘g‘ri ovqatlanish inson salomatligiga zarar yetkazishi mumkin. Jahon sog‘liqni saqlash tashkilotining ta’kidlashicha, ro‘zadorlar sog‘lom ovqatlanish tavsiyalariga amal qilib, ortiqcha vazndan xalos bo‘lish, qon bosimi va organizmdagi xolesterin miqdorini pasaytirishga erishish mumkin. 

Koʻp miqdorda suv ichish

Iftorlik va saharlik oralig‘ida ko‘p miqdorda suv ichish tavsiya etiladi. Kunduzi havo harorati yuqori bo‘lganda ko‘p terlashni keltirib chiqarishi mumkin. Shu bois kun davomida yo‘qotilgan suyuqlik o‘rnini qoplash ehtiyoji yuzaga keladi. Buning uchun esa ko‘proq suv ichish tavsiya etiladi.

Hoʻl mevalar foydali 

Sersuv mahsulotlar tanovul qilish orqali ham bu me’yorni qisman qoplash mumkin. Masalan, saharlik paytida yoki iftorlikdan keyin dessert sifatida ho‘l mevalardan yeyish foydali. “Achiq-chuchuk” salati tarkibidagi bodring va pomidor ham sersuv ne’matlar hisoblanadi. Sho‘rva yoki sabzavotli salatlar singari suvga boy taomlarni ham iste’mol qilish mumkin.

Ushbu mahsulotlardan voz kechish kerak

Tarkibida kofein mavjud bo‘lgan mahsulotlar — kofe, kola kabi ichimliklardan voz kechib turgan ma’qul. Chunki bu modda inson organizmida suv miqdori kamayishiga olib keladi. Kun davomida juda doimiy harakat qilish organizmning ko‘p miqdorda suv yo‘qotishiga olib keladi. Qisqa muddatli sayr yoki chigalyozdi mashqlari sizni tonusda ushlab turishi mumkin. Ammo kun bo‘yi harakatsiz o‘tirish ham tavsiya qilinmaydi.

Saharlik va iftorlikda nima yeyish kerak?

“Og‘izni yopish”dan oldin ovqat yeyish lozim. Saharlik paytida yengil taomlanish, ayniqsa, ro‘za tutishni maqsad qilgan katta yoshdagi insonlar, o‘smirlar, homilador ayollar, emizikli farzandi bor onalar hamda bolalar uchun juda muhim! Yengil nonushta sifatida sabzavotlar, tarkibida uglevod bo‘lgan donli nonlar yoki bulochkalar, sut mahsulotlari (tuzsiz pishloq, suzma, sut) yoki tuxum kabi oqsilga boy ne’matlarni iste’mol qilish foydali.

Kimlarga roʻza tutishi tavsiya etilmaydi?

Ammo shunday toifadagi bemorlar borki, ro‘za tutish ularning salomatligi uchun xavfli bo‘lishi mumkin. Mutaxassislar fikricha, jarrohlik amaliyoti o‘tkazilishini talab qiluvchi va operatsiyadan keyingi davrda bemorlar ro‘za tutishi maqsadga muvofiq emas. Bundan tashqari, doimiy ravishda dori ichishi kerak bo‘ladigan yurak-qon tomir, buyrak va jigar xastaliklarining og‘ir ko‘rinishlari hamda qandli diabetda ham ushbu amalni bajarish tavsiya etilmaydi. Qolaversa, og‘riq bilan kechadigan va og‘riq qoldiruvchi dorilarni muntazam qabul qilishi talab qilinadigan, xususan, sil va onkologik kasalliklarining ayrim turlarida ham ro‘za tutish mumkin emas. Ular ro‘za tutish niyatida bo‘lsalar, avvalo, shifokor bilan maslahatlashishlari lozim.