Ўзбекистонда қишлоқ хўжалиги мутахассислари тайёрлаш учун Италия ОТМлари филиаллари очилади

Олий таълим, фан ва инновациялар вазири Иброҳим Абдураҳмонов BMB Trade Group кузатув кенгаши раиси Бекзод Маматқулов билан учрашди.

Суҳбат чоғида олий ва касб-ҳунар таълими муассасалари фаолиятини такомиллаштириш, ёшларни кафолатланган иш ўринлари билан таъминлашга қаратилган лойиҳалар доирасида давлат-хусусий шериклигини ўрнатиш масалалари муҳокама қилинди.

Бекзод Маматқулов Ўзбекистонда қишлоқ хўжалиги соҳасида мутахассислар тайёрлайдиган Италиянинг нуфузли университетлари филиалларини очишни таклиф қилди. У Жиззах вилоятида фаолият юритаётган 28 та корхонани касб-ҳунар коллежларида маълумот олган мутахассислар билан таъминлаш зарурлигини таъкидлади.

Иброҳим Абдураҳмонов BMB Trade Group компанияси таклифларини қўллаб-қувватлади ва ушбу масалаларни давлат-хусусий шериклик форматидаги махсус лойиҳалар доирасида ишлаб чиқишга тайёр эканини билдирди.

Учрашув якунлари бўйича томонлар Ўзбекистонда Италиянинг нуфузли университетлари бўлимларини очиш, Жиззах вилоятидаги касб-ҳунар таълим муассасаларидан бирини компания тизимида фаолият юритаётган корхоналарнинг эҳтиёжларини ҳисобга олган ҳолда мутахассислар тайёрлашга йўналтириш ва бунинг учун махсус ўқув дастурларини ишлаб чиқиш ва тасдиқлашга келишиб олинди.