Navoiy davlat universiteti tashkil etiladi

Prezidentning 31-oktyabrda qabul qilgan qaroriga ko‘ra, Navoiy davlat universiteti tashkil etiladi.

Universitet Pedagogika instituti negizida tashkil qilinadi

Qarorga ko‘ra, Navoiy davlat pedagogika instituti negizida Navoiy davlat universiteti tashkil etiladi. Hududda soha va tarmoqlarning rivojlanish istiqbollarini hisobga olgan holda zamonaviy bilim va malakaga ega bo‘lgan ilmiy va ilmiy-pedagogik kadrlarni tayyorlash, qayta tayyorlash va ularning malakasini oshirish bo‘yicha uzluksiz ta’lim tizimini yaratish Universitetning asosiy vazifalari va faoliyat yo‘nalishlaridan biri etib belgilandi.

2025-yil bitiruvchilari endi universitet diplomini olishadi

Shuningdek, Navoiy davlat pedagogika institutida tahsil olayotgan barcha talabalar o‘qishlarini Universitetda davom ettiradi hamda 2024/2025 o‘quv yilidan bitiruvchi kurs talabalariga Universitet diplomi beriladi. 

Universitetda 2025/2026 o‘quv yilidan ehtiyoj yuqori bo‘lgan quyidagi yo‘nalishlar bo‘yicha kadrlar tayyorlash yo‘lga qo‘yiladi:

aniq va tabiiy fanlar;

axborot texnologiyalari;

sun’iy intellekt; iqtisodiyot;

biznes va turizm;

investitsiyalarni boshqarish;

qishloq xo‘jaligi;

ekologiya va atrof-muhit muhofazasi;

logistika.

Xususan, yangi tashkil etilgan ta’lim yo‘nalishlari va mutaxassisliklar bo‘yicha xorijiy davlatlar va respublikadagi yetakchi oliy ta’lim tashkilotlari bilan ikkita diplom berishga asoslangan qo‘shma ta’lim dasturlari yo‘lga qo‘yiladi.

Transformatsiya markazi tashkil qilinadi va antiplagiat mexanizmi joriy etiladi

Shuning bilan birga, universitetda Transformatsiya markazi tashkil etiladi va u quyidagi masalalar yuzasidan mas’ul etib belgilandi:

Universitetning ta’lim dasturlarini xalqaro ta’lim standartlariga muvofiqlashtirish;

Universitetni dunyoning eng nufuzli oliy ta’lim tashkilotlari reytingiga kiritish chora-tadbirlarini ishlab chiqish va ijrosini tashkil etish;

Universitet ta’lim dasturlarini xalqaro akkreditatsiyadan o‘tkazish hamda Universitet diplomlarining xorijda tan olinishiga erishish;

Registrator ofisi faoliyatini yo‘lga qo‘yish;

Universitetning ta’lim, tadqiqot va axborot-kutubxona faoliyatlarini hamda boshqaruv jarayonlarini to‘liq raqamlashtirish.

2025-yil 1-iyungacha Universitetda talabalarning bitiruv malakaviy ishlari va magistrlik dissertatsiyalarini ko‘chirmachilikka qarshi tekshirish (antiplagiat) mexanizmi joriy etiladi.