Maymun yetaklagan maymuncha: Pingvindan keyingi trend odamlarga nima demoqchi?

Bugungi kunda ijtimoiy tarmoqlarning o‘zbek segmentida ham, jahon trendlarida ham bir mitti jonzotning surati qo‘ldan-qo‘lga o‘tmoqda. Bu — Yaponiyadagi hayvonot bog‘ida yashovchi, bag‘ri qon Panch laqabli mitti makaka. Uning suratlariga boqib, ko‘zyoshni tiyib turish mushkul: jajji maymuncha o‘zidan katta o‘yinchoq-orangutanni mahkam quchoqlab olgan. Bu shunchaki o‘yin emas, bu — ona mehriga tashnalikning tirik timsolidir.

Tush ko‘rmayotgan haqiqat: Panch nega yolg‘iz qoldi?

Hammasi 2025-yilning jazirama iyulida boshlangan edi. Yaponiya poytaxti yaqinidagi Ichikava hayvonot bog‘ida Panch dunyoga keldi. Atigi 500 gramm vazn bilan tug‘ilgan bu mittivoy hayotning ilk sinoviga duch keldi — o‘z onasi undan voz kechdi. Mutaxassislarning tushuntirishicha, birinchi marta ona bo‘lgan makaka tug‘ruqdan keyingi charchoq va jazirama issiq tufayli o‘z bolasini qabul qilmagan.

Tabiat qonunlari shafqatsiz: agar inson aralashmaganida, Panch ochlikdan yoki tanholikdan nobud bo‘lishi aniq edi. Shu pallada hayvonot bog‘i xodimlari — Kosuke Shikano va Shumpei Miyakoshi uning hayoti uchun kurash boshladilar.

O‘yinchoq — najot qal’asi

Maymun bolalari uchun onaning yungi va tafti faqat ozuqa manbai emas, balki xavfsizlik kafolatidir. Panch onasidan ajratilgach, u ruhan ezila boshladi. U nimanidir quchoqlashi, kimningdir taftini his qilishi kerak edi. Xodimlar unga sochiqlar, turli matolar berib ko‘rishdi, biroq mittivoy ularga ko‘nikmadi.

Oxir-oqibat, unga jigarrang, yumshoq orangutan o‘yinchog‘i berildi. Panch go‘yo o‘z onasini topgandek unga yopishib oldi. O‘yinchoqning uzun yunglari unga onasining bag‘rini eslatgan bo‘lsa ajab emas. O‘shandan beri Panch va uning “o‘yinchoq onasi” ajralmas bo‘lib qoldi. Hatto uxlashda ham u o‘yinchoqni bag‘riga bosib orom oladi.

#HangInTherePunch: Nega butun dunyo u haqda gapirmoqda?

Panchning hikoyasi shunchaki hayvonot bog‘idagi voqea bo‘lib qolmadi. Yanvar oyida u o‘z to‘dasiga qaytarildi, biroq u yerda uni ochiq chehra bilan kutib olishmadi. Boshqa maymunlar begona xid kelayotgan va g‘alati o‘yinchoq ko‘targan Panchga tahdid qila boshlashdi.

Aynan shu manzaralar — o‘z to‘dasi ichida o‘yinchoqqa yopishib, xavfsizlik izlayotgan mitti jonzotning holati ijtimoiy tarmoqlarni larzaga keltirdi. X (Twitter) tarmog‘ida #HangInTherePunch (#G‘ayratQilPanch) heshtegi ostida millionlab postlar yozildi. Odamlar uning mardligiga, yolg‘izlikka qarshi kurashiga qoyil qolishmoqda.

“Panchning suratlarini ko‘rib, yuragim tozalanib ketgandek bo‘ladi. Biz insonlar ba'zan oddiy mehribonlikni unutsak, u bir parcha matodan bo‘lsa-da, mehr izlayapti”, — deb yozadi foydalanuvchilardan biri.

Panch o‘zini topa oladimi?

Bugungi kunda Panch 2 kilogramm vaznga ega. U hali ham o‘z jamoasiga to‘liq qo‘shilib keta olgani yo‘q, ko‘p vaqtini chetda, o‘sha sevimli o‘yinchog‘i bilan o‘tkazadi. Ammo mutaxassislar ijobiy o‘zgarishlarni qayd etishmoqda. U asta-sekin boshqa maymunlar bilan muloqotga kirishmoqda. Eng muhimi, u ruhiy jihatdan baquvvat — hatto to‘dadagi kattaroq maymunlar uni turtkilasa ham, u tushkunlikka tushmay, o‘z yo‘lida davom etmoqda.

Fevral oyi o‘rtalarida hayvonot bog‘iga Panchni ko‘rish uchun kelganlar soni rekord darajaga yetdi. Odamlar uzoqdan bo‘lsa-da, mitti qahramonning hayotini kuzatishni, unga ma'naviy dalda berishni istashadi.

Panch messeji

Panchning hikoyasi — bu faqat hayvonot olami haqidagi xabar emas. Bu har birimizga yetishmayotgan samimiyat, mehr va qiyinchiliklar oldida yengilmaslik darsidir. Bir parcha yumshoq matoni ona deb bilgan Panch, dunyoga mehribonlik qanchalik muhimligini yana bir bor eslatib qo‘ydi.