Бу йил 1-синфларга “Президент совғаси” бериладими?

Жорий йилда ҳам одатдагидек 1-синф ўқувчиларига “Президент совғаси” топширилади. Бу ҳақда Халқ таълими вазирлигига таяниб, ЎзА хабар берди.

Махсус комиссия қарорига биноан, пандемия шароитини ҳисобга олиб мактабларда янги ўқув йилининг биринчи куни 14 сентябрь этиб белгиланган. Шу куни 650 мингга яқин 1-синф ўқувчиларига “Президент совғаси” топширилиши режалаштирилган.

1-синф ўқувчиларига бериладиган “Президент совғаси” таркибидан 12 турдаги ўқув қуроллари, жумладан портфель, дафтарлар, расм дафтари, акварел бўёқлари, рангли қоғоз, қаламдон, шарикли ручка, рангли ва оддий қаламлар, пластилин, елим ва ўчирғич ўрин олган.

Вазирликка кўра, “Президент совғаси” ўқишнинг қайси шакли (анъанавий ёки масофавий) танланишидан қатъи назар, барча ўқувчиларга берилади. Бунда “Президент совғаси” масофавий ўқишни танлаган 1-синф ўқувчиларининг ота-оналарига топширилади.