Agar umri davomida adolatsizlik bo‘lmaganda edi, balki hozir Sherali Jo‘rayev yonimizda bo‘lar edi — SHavkat Mirziyoyev

Kuni kecha Prezident Shavkat Mirziyoyev Andijon viloyatida bo'lib, sanoat va qishloq xo‘jaligi korxonalari, ijtimoiy soha obyektlari va mahallalar hayoti bilan tanishdi hamda hududni ijtimoiy-iqtisodiy rivojlantirish bo‘yicha kelgusi vazifalarni belgilab berdi

Marhumlar yodi

Prezident viloyat faollari bilan bo'lgan kechki suhbat vaqtida o‘zbek qo‘shiqchilik san’ati rivojida o‘chmas iz qoldirgan O‘zbekiston va Tojikiston xalq san’atkori, mashhur hofiz Sherali Jo‘rayev nomini barcha alohida hurmat bilan esga olishini ta’kidlab, xonandani esga oldi. SHundan so'ng, davlat rahbari Andijon shahridagi san’at maktabiga Sherali Jo‘rayev nomini berish taklifini ilgari surdi. 

Maktab haqida 

Ushbu maktab kelajakda Musiqa va san’at kollejiga aylantirilib, u yerda grant asosida zamonaviy kadrlar tayyorlash yo‘lga qo‘yilishi reja qilingan. SHuningdek, yangi o‘quv va turar joy binosida, zarur infratuzilma obyektlari barpo etilishi, shuningdek, Sherali Jo‘rayev byusti o‘rnatilshi kutilmoqda. 

Hozir bunday insonlar yetishmaydi...

"Agar umri davomida adolatsizlik bo‘lmaganda edi, balki hozir Sherali Jo‘rayev yonimizda bo‘lar edi. Sherali Jo‘rayev, Erkin Vohidov, Abdulla Oripov, Halima Xudoyberdiyevaga o‘xshagan insonlarni ta’riflashga baholar yetmaydi, haqiqatda hozir bunday insonlar yetishmaydi", degan davlat rahbari. 

"Ota 40 yoshimni qaytarib berdilar"

Yig'ilish davomida marhum qo‘shiqchining katta o‘g‘li Shohjahon Jo‘rayev ham so‘z olib, otasining ijodi ikki davrga bo‘linishi, 90-yillardan boshlab 25 yil davomida taqiqda yurgani, 2016-yildan esa ikkinchi davri boshlangani haqida gapirar ekan, "Biz har yili mustaqillik bayramini tomosha qilib, otamiz chiqarmikan, O‘zbegimni aytarmikan, deb duo qilardik. Shu kunni siz otamizga qaytib berdingiz. Otam qaytib kelib, ota 40 yoshimni qaytarib berdilar, degandi", deya marhum san'atkorni yodga oldi.