2023 йил 7 декабрнинг энг муҳим воқеалари дайжести

Назарбоев Мирзиёевга муаллифлик китобини совға қилди

Қозоғистоннинг биринчи президенти Нурсултон Назарбоев Шавкат Мирзиёевга ўзининг “Менинг ҳаётим. Қарамликдан озодликка” номли мемуар асарини совға қилди. Муаллиф дастхати қўйилган китобни 6-декабр куни Нурсултон Назарбоевнинг матбуот котиби Айдос Укибай Шавкат Мирзиёевнинг матбуот котиби Шерзод Асадовга топширди.

Китобда Нурсултон Назарбоев ўзининг ҳаёт йўли тарихий жараёнлар ва мамлакатнинг шаклланиш, ривожланиш даври тўғрисидаги хотиралари билан ўртоқлашади. Бундан ташқари, муаллиф рэспубликага раҳбарлик қилган охирги ўн йилликдаги воқеаларга баҳо бериб ўтган.

 Бухородаги “долзарб 40 кунлик”

Бухоро вилоятида ўтказилган тезкор профилактик тадбирлар давомида жиноий ишларга алоқадор 38 та шахс қамоққа олинди. Мазкур рейд орқали содир этилиб, фош қилинмасдан қолган 22 та жиноят фош этилиб, қидирувда бўлган 31 нафар шахс ушланган. Бундан ташқари, 1 та одам ўғирлаш ва босқинчилик, 8 та гиёҳвандлик билан бирга психотроп дори воситаларини қонунга хилоф равишда сотиш, 2 та ноқонуний ов қуроли сақлаш ҳамда 9 та бошқа турдаги жиноятлар аниқланган.

 2023-2024 ўқув йили президент ва давлат стипендиялари ғолиблар рўйхати эълон қилинди

Олий таълим, фан ва инновациялар вазирлигининг маълум қилишича, давом этаётган ўқув йили учун бакалавриат босқичининг 685 нафар талабасига президент ва номли давлат стипендиялари берилди.

Танловнинг бошқа босқичларида иштирок этган талабалар учун ҳам тегишли миқдорда мукофот пуллари ва совғалар ажратилган.

Теннисчимиз чорак финалда

БААнинг Дубай шаҳрида бўлиб ўтаётган турнирда теннисчимиз Нигина Абдураимова чорак финал босқичига йўлланмани қўлга киритди.

Маълумот учун, Н.Абдураимова Бутунжаҳон хотин-қизлар теннис уюшмаси рейтинг жадвалида 245-поғонада бормоқда. Қўшимча қилиш керакки, хотин-қизлар ўртасида ўтказилаётган бу турнирнинг мукофот жамғармаси 100 минг АҚШ долларини ташкил этади.