$
 10295.33
21.16
 12194.82
32.26
 137.65
1.37
weather
+32
Кечаси   +15°

Пандемия даврида Ўзбекистонга кириш ва чиқиш тартиби қандай?

Пандемия даврида Ўзбекистонга кириш ва чиқиш тартиби қандай?

Ташқи ишлар вазирлиги COVID-19 пандемияси билан боғлиқ карантин режими даврида Ўзбекистонга кириш ва чиқиш тартиби бўйича тез-тез учраётган саволларга тушунтириш бериб ўтди.

Вазирликка кўра:

1. 2020-йил 15-июндан бошлаб қуйидаги тоифадаги фуқароларга авиақатновлар орқали Ўзбекистонга кириш учун карантин чоралари соддалаштирилди:

— хорижий давлатлар дипломатик ваколатхоналари ва консуллик муассасалари ходимлари ҳамда уларнинг оила аъзолари;

— инвеститсия лойиҳалари доирасида хорижий компания ва бошқа ташкилотларнинг Ўзбекистонда ишлаётган мутахассислари;

— даволаниш учун келаётган шахслар;

— Ўзбекистонда “доимий яшаш жойига эга” хорижий фуқаролар ва фуқаролиги бўлмаган шахслар.

Ушбу тоифадаги фуқаролар мамлакатга кириш учун рухсатнома сўраб Ўзбекистон Республикасининг тегишли органларига мурожаат қилишлари шарт эмас.

2. Хорижда вақтинча бўлиб турган ёки чет элда доимий асосда яшовчи ва ватанга авиақатновлар орқали қайтишни истаётган Ўзбекистон Республикаси фуқароларининг мамлакат ҳудудига киришларида ҳеч қандай чекловлар кўзда тутилмаган.

3. Ўзбекистондан транзит орқали бошқа давлатга кетаётган чет эл фуқароларнинг мамлакат ҳудудидан ўтишларига хорижий давлат дипломатик ваколатхонаси ва консуллик муассасасининг Ўзбекистон Республикаси Ташқи ишлар вазирлигига аввалдан қилган сўровлари асосида рухсат берилади.

Ўзбекистон Республикасидан чиқиш тартиби қандай?

1. 2020-йил 15-июндан бошлаб қуйидаги тоифадаги Ўзбекистон Республикаси фуқароларига авиақатновлар орқали Ўзбекистондан чиқиб кетиш учун карантин чоралари соддалаштирилди:

— даволаниш учун чиқаётган шахслар;

— хорижда яқин қариндошлари ёҳуд оғир касал бўлган қариндош-уруғлари мавжуд бўлган шахслар;

— хорижий давлатда доимий рўйхатдан ўтган Ўзбекистон фуқаролари;

— ўқиш ёки ишлаш учун чет элга кетаётган фуқаролар.

Ушбу тоифадаги фуқаролар мамлакатдан чиқиб кетишга рухсат олиш учун Ўзбекистон Республикасининг тегишли органларига мурожаат қилишлари шарт эмас.

2. Ўзбекистондан чет элга кетишдан олдин ва мос равишда авиачиптани сотиб олишдан олдин 1-бандда кўрсатилган фуқароларга пандемия пайтида улар бормоқчи бўлган мамлакатга кириш учун амалдаги тартиб ва шартлар ҳамда карантин чоралари тўғрисида зарур маълумот олиш учун ўша мамлакатнинг Ўзбекистондаги дипломатик ваколатхонасига мурожаат қилиш тавсия қилинади.

Авиачипталарни сотиб олиш учун тегишли авиакомпанияларнинг ваколатхоналарига мурожаат қилиш керак. Чипталарни сотишда авиакомпаниялар фуқаронинг белгиланган мамлакатга кириш ҳуқуқини тасдиқловчи ҳужжатларни талаб қилиши мумкин.

Шу билан бирга, парвозлар санитария қоидалари ва тартибларига қатъий амал қилган ҳолда ташкил этилади.

3. Ўзбекистон Республикаси фуқаролари чет элга ер усти орқали чиқишлари учун Ўзбекистон Республикасига коронавируснинг кириб келиши ва тарқалишини олдини олиш юзасидан чора-тадбирлар дастурини тайёрлаш бўйича республика махсус комиссиясининг қарори талаб қилинади.

4. Хорижий фуқароларнинг Ўзбекистон Республикасидан ташқарига чиқишига ҳеч қандай чекловлар кўзда тутилмаган.

5. Ўзбекистон Республикаси ҳудудидаги хорижий фуқароларнинг визалари муддати автоматик тарзда 2020-йил 1-ноябргача узайтирилади.