5 та хусусий университетнинг лицензияси бекор қилинган. Талабалар тақдири нима бўлади?

2022 йил якунига кўра, Ўзбекистонда нодавлат ва хорижий ОТМлар сони 85 тани ташкил этади. Ҳозиргача 5 та хусусий университетнинг лицензияси бекор қилинган, 1 тасининг лицензиясини бекор қилиш бўйича суд жараёни давом этмоқда. Шу ўринда савол туғилади, хусусий ОТМнинг лицензияси тўхтатилса, ундаги талабалар нима қилади?

Лицензияси бекор қилинган университетлар қайси?

Лицензияси бекор қилинган университетлар:

•Valley innovative university;

•Туркистон янги инновациялар университети;

•Тошкент технологиялар университети;

•Наманган халқаро университети;

•Урганч шаҳридаги Binary халқаро университети.

Энди нима бўлади?

Вазирлик лицензияси бекор қилинган хусусий ОТМларнинг талабалари ўқишни бошқа университетга кўчириши мумкинлигини маълум қилди.

2023 йил 3 июлдаги ПҚ-200-сон қарорга кўра лицензияси бекор қилинган таълим ташкилоти ёки ёпилган таълим дастурида таҳсил олаётган талабаларга ўқишини давлат ва нодавлат таълим ташкилотларининг мос ва турдош таълим йўналишлари ва мутахассисликларига белгиланган тартибда кўчириш ҳуқуқи вазирликка берилган.

2 университет талабалари бошқа ОТМга кўчирилган

Cуд жараёнлари тўлиқ якунланган ва лицензияси бекор қилинган олий таълим ташкилотлари — Valley Innovative University, Урганч шаҳридаги Binary университетининг барча талабалари тегишли тартибда олий таълим ташкилотларига кўчирилган. «Ҳозирда лицензияси бекор қилинган бошқа олий таълим ташкилотларининг талабаларини ўқишини кўчириш ишлари ташкил этилмоқда» — дейилади вазирлик хабарида.

Вазирлик лицензияси бекор қилинган олий таълим ташкилотларининг бирон-бир талабаси кўчада қолмаслигини маълум қилди. Барча талабаларнинг аризасига асосан ўқиши белгиланган тартибда бошқа олийгоҳларга кўчирилиши таъминланади.