Nipah virusi nazorat ostida, biroq xavf saqlanib qolmoqda: Hindistonda hamshira vafot etdi, ekspertlar asosiy xavf guruhi haqida ogohlantirmoqda

Global miqyosda tarqalish ehtimoli past bo‘lishiga qaramay, Nipah virusi dunyodagi eng xavfli infeksiyalardan biri bo‘lib qolmoqda. Ekspertlarning ogohlantirishicha, eng katta xavf ostida tibbiyot xodimlari va bemorlarni parvarish qilayotgan shaxslar turibdi.

Tibbiyot xodimlari — asosiy xavf guruhida

Sharqiy Angliya universiteti qoshidagi Norvich tibbiyot maktabi professori Pol Xanter “RIA Novosti”ga bergan izohida, Nipah virusi ko‘pincha infeksiyalangan odam bilan yaqin muloqotda bo‘lganda yuqishini ta’kidladi.

Uning so‘zlariga ko‘ra, dastlab infeksiya odamdan odamga o‘tmaydi deb hisoblangan, biroq hozirda uning yuqishi, asosan bemorlarni parvarish qilish jarayonida sodir bo‘lishi o‘z tasdig‘ini topgan.

Shu bilan birga, ekspert virusning yuqumlilik darajasi nisbatan past ekanini qayd etdi. Kasallanish holatlarining aksariyati yo zararlangan hayvonlar bilan bevosita aloqa qilish, yoki ko‘rshapalaklar tomonidan ifloslantirilgan meva va mahsulotlarni iste’mol qilish bilan bog‘liq.

Virusning Osiyo chegaralaridan chiqish ehtimoli bormi?

Professorning baholashicha, virusning Yevropada barqaror tarqalishi ehtimoldan yiroq. Biroq, ayrim chetdan olib kirilish holatlarini butunlay inkor etib bo‘lmaydi. Italiyadagi qishki Olimpiya o‘yinlari vaqtida yuqtirish xavfi haqidagi savolga javob berar ekan, ekspert ehtimol minimal ekanini, ammo nolga teng emasligini ta’kidladi. O‘z navbatida, Jahon sog‘liqni saqlash tashkiloti virusning global miqyosda tarqalish xavfini past deb baholamoqda.

Hindistonda ikkinchi o‘lim holati

Ekspertlarning bayonotlari fonida Hindistonda Nipah virusi bilan bog‘liq ikkinchi o‘lim holati tasdiqlandi. Bu haqda “NDTV” telekanali xabar berdi.

Ommaviy axborot vositalari ma’lumotlariga ko‘ra, 25 yoshli hamshira o‘zi ishlayotgan shifoxonadagi bemordan virus yuqtirib olgan. U deyarli bir oy davomida og‘ir ahvolda, koma holatida bo‘lgan. Dastlabki Nipah testi manfiy natija ko‘rsatgan bo‘lsa-da, keyinchalik unda og‘ir o‘pka infeksiyasi rivojlangan. Bemor sun’iy nafas oldirish apparatiga ulangan edi.

Ahvolni barqarorlashtirish choralariga qaramay, ayolning immuniteti keskin zaiflashgan va yurak to‘xtashi natijasida vafot etgan. U yil boshida infeksiya yuqtirgani tasdiqlangan ikki tibbiyot xodimidan biri edi.

Nipah virusi haqida nimalar ma’lum?

Virus ilk bor qariyb 30 yil avval aniqlangan. O‘shandan beri har yili, asosan Hindiston va Bangladeshda bir-ikki marotaba kasallik chaqnashi kuzatiladi. Infeksiya hayvonlardan — ko‘pincha ko‘rshapalaklar va cho‘chqalardan — odamga o‘tadi. Kasallik nafas yo‘llarini zararlaydi va ensefalitga (miya yallig‘lanishi) sabab bo‘lishi mumkin. O‘lim ko‘rsatkichi 40 foizdan 75 foizgacha o‘zgarib turadi. Bugungi kunda unga qarshi maxsus davolash usuli yoki vaksina mavjud emas.

Yanvar oyida Kalkutta shahri yaqinida kasallik tarqalishi qayd etilgan edi. Rasmiy ma’lumotlarga ko‘ra, besh kishi kasallangan, ular bilan aloqada bo‘lgan yuzga yaqin kishi karantinga olingan. Ko‘plab Osiyo mamlakatlari sanitariya nazoratini kuchaytirdi.

Vaziyat xalqaro tashkilotlar nazorati ostida qolmoqda. Keng ko‘lamli tarqalish ehtimoli past bo‘lishiga qaramay, mutaxassislar epidemiologik xavfsizlik choralariga, ayniqsa, tibbiyot xodimlari orasida qat’iy rioya qilish zarurligini uqtirmoqdalar.