“Qora dayjest”: 2024-yil 31-oktyabr voqealari

Surxondaryoda 6-qavatdan tushib ketgan qiz vafot etdi

29-oktyabr, seshanba kuni soat 21:00 atrofida Surxondaryo viloyatining Denov tumanining “Buyuk Kelajak” mahallasida ayanchli voqea sodir bo‘ldi. Unda ushbu mahallada joylashgan 16 qavatli uyning 13-qavatida yashab kelgan oilaning 17 yoshli qizi 6-qavatdan tushib ketib, olgan tan jarohatlari sabab vafot etgan.

Mahalla raisining “Zamon” axborot dasturiga aytishicha, marhuma oilaning to‘ng‘ich farzandi bo‘lgan. U maktabda ham yaxshi xulqli va a’lo baholarga o‘qigan o‘quvchilar qatorida bo‘lgan.

Yuqorichirchiqda Lacetti zovurga tushib ketdi

FVV qutqaruvchilari tomonidan zovurga tushib ketgan avtomashina chiqarib olindi. Hodisa oqibatida vafot etgan va tan jarohati olganlar yo‘q.

Bugun, 31-oktabr kuni soat 01:12 da Toshkent viloyati Favqulodda vaziyatlar boshqarmasiga Yuqorichirchiq tumani “Saxovat” mahallasi hududidan oqib o‘tuvchi zovurga “Lacetti” rusumli avtotransport vositasi haydovchisi boshqaruvni yo‘qotishi natijasida tushib ketgani haqida xabar tushgan.

Shunga ko‘ra, Yuqorichirchiq tumani FV bo‘limi qutqaruvchilari zudlik bilan aytilgan manzilga yetib borib, hamkorlikdagi xizmatlar bilan maxsus texnika va asbob-anjomlar yordamida avtomobil zovurdan chiqarib olingan.

Buxorodagi ko‘p qavatli uyda gaz chaqnashi sabab bir kishi halok bo‘ldi

Joriy yilning 29-oktyabr kuni soat 23:35 larda hali topshirilmagan “dom”ning 5-qavatida sodir bo‘lgan portlash ovozi atrofdagi boshqa ko‘p qavatli uylarda yashovchi aholini ham xavotirga solgan va odamlar ko‘mak uchun ko‘chaga chiqishgan.

Buxoro viloyat Favqulodda vaziyatlar boshqarmasi axborot xizmatining ma’lum qilishicha, shu kuni soat 23:40 da viloyati IIB navbatchisidan shu haqda xabar kelib tushgan. Bildirilishicha, mahalladagi 6/3A-uy, 14-xonadonda gaz va havo aralashmasining chaqnashi sodir bo‘lgan. Chaqnash natijasida uyning xonalarini ajratuvchi, devor, eshik va romlari zararlangan. Dastlabki ma’lumotga ko‘ra, chaqnash oqibatida 14- xonadonda 1 nafar fuqaro vafot etgan hamda 14-15- xonadonlarda yashovchi 5 nafar fuqarolar turli darajadagi tan jarohati olib, shahar markaziy shifoxonaga olib ketilgan.

Navoiydagi cho‘lda 10 nafar yigit pichoqlashdi

Navoiy viloyati, Konimex tumanidagi janjal oqibatida bir yigit halok bo‘ldi. Bu haqda “Yangi Davr” ko‘rsatuvida xabar berildi.

Qayd qilinishicha, hodisa kelishmovchilik ortidan yuz bergan. Ikki aka-uka “ko‘cha tili”da gaplashib olish uchun raqibini cho‘lga chaqirgan. U esa 7 nafar do‘sti bilan qurollangan holda yetib kelgan. Janjal esa pichoqbozlikka aylangan. Yakunda ov miltig‘idan osmonga o‘q uzilgan.

Janjal paytida yigitlardan biri boshqasiga ikki marta pichoq urib, og‘ir tan jarohati yetkazgan. Jabrlanuvchi olgan tan jarohatlari oqibatida vafot etgan.

Holat yuzasidan jinoyat ishi qo‘zg‘atilib, ish Uchquduq tuman sudida ko‘rib chiqildi. 8 nafar sudlanuvchi 1 yildan 3,5 yilgacha qamoq jazosiga hukm qilindi.