“Қора дайжест”: 2023 йил 22 декабрь воқеалари

Фарғонанинг 5 туманида “свет” йўқ

Фарғона вилоятидаги 110 кВ кучланишли “Л-Чархий-2” ва “Л-Чилмаҳрам” электр узатиш тармоқларида носозлик юзага келди. Бунинг оқибатида Бағдод, Бувайда, Учкўприк, Бешариқ ҳамда Фурқат туманларидаги 6000 та истеъмолчилар қисман электр таъминотидан узилган.

Ҳозирги вақтда мазкур носозликлар “Фарғона ҳудудий электр тармоқлари” АЖнинг махсус бригадалари томонидан бартараф этилмоқда.

“Tracker” ҳайдовчиси 8 ва 10 ёшли болаларни уриб кетди

Жорий йилнинг 20 декабрь куни соат 16:30 ларда Юнусобод тумани 8-мавзеда 1986 йилда туғилган ҳайдовчи Н.А. Tracker машинасини бошқариб кетаётиб, 2 нафар пиёдани уриб юборган. Оқибатда 2015 йилда туғилган З.А. ва 2013 йилда туғилган болалар тан жароҳат олган.

“Доричи”лар ушланди

Тошкент вилоятида "Долзарб 40 кунлик" тезкор-профилактик тадбирлари доирасида кучли таъсир қилувчи ва психотроп дори воситалари савдоси билан шуғулланувчи жиноий гуруҳ аниқланди. Тўрт кун давом этган тезкор-қидирув тадбирлари натижасида, кучли таъсир қилувчи дори воситаларининг савдоси билан шуғулланувчи 6 нафар шахсдан иборат жиноий гуруҳ қўлга олинган. Натижада 178 миллион сўмлик жами 2 минг донадан ортиқ кучли таъсир қилувчи, психотроп дорилар ҳамда синтетик гиёҳвандлик воситалари муомаладан олинди.

Тошкентда яна ҳаво сифати ҳаёт учун хавфли

Тошкентда ҳавонинг ифлосланиш даражаси сиёҳранг, яъни энг хавфлилик нуқтасига етди. Маҳаллий вақт билан 11.30 даги ҳавонинг ифлосланиш даражаси 244 баллни ташкил этди. ИҚАир маълумотига кўра, пойтахт ҳавосининг асосий ифлосланиши PM2.5 дисперс заррачалари ҳисобига тўғри келади. Ушбу кўрсаткич соат сайин кўтарилиб бормоқда. Хусусан, соат 11:00 лар атрофида Тошкент шаҳрининг кўрсаткичи 166 даража билан қизил рангда, дунё мамлакатлари рейтингида 10-ўринда турганди. Ярим соат ичида пойтахт ҳавоси энг ифлос шаҳарлар рўйхатида бирдан 3-ўрингача кўтарилди. 

Охирги маълумотларга кўра, Тошкент 166 балл билан 9-ўринда.